College zirtirtu atan mi 31 tling

Mizoram Public Service Commission (MPSC) chuan Mizoram sorkar hnuaia college-a a ngheta thawk tur zirtirtu, assistant professor tur lakna result April 1, 2026 khan a tichhuak a; mi 31 an tling.

College assistant professor tur laknaah hian MPSC chuan March 16, 2026 aṭanga April 1 thleng khan personal interview an buatsaih a, interview zawh ni-ah result tihchhuah nghal a ni. MPSC-in college zirtirtu atana a rawt mi 31-te chu department/subject 13-a mi tur an ni a; panel list-ah mi 28 an awm bawk.

MPSC-in assistant professor lakna result a tihchhuah chungchangah hian Mizo Students’ Union Gen. Hqrs chuan thuchhuah siamin, Mizo vek an tling chu lawmawm a tih thu an tarlang.

MSU chuan, assistant professor lak a ni dawn tih an hriat tirh aṭangin ram leilung fa ngei an luh theih nan hma an lak thu sawiin, "Assistant professor post awm zawng zawnga Mizo kan tling thei vek hi lawmawm kan tiin, tling tharte kan lawmpui hle. Tling zawng zawngte pawh zirlaite leh ram leh hnam hmangaihna rilru nena hna thawk turin duhsakna kan hlan a ni," an ti.