Sorkar hnathawk leh general beneficiary tan MUHCS 2.0 hmang turin card a ngai

Mizoram sorkar chuan Mizoram Universal Healthcare Scheme (MUHCS) 2.0-a pawisa chawia inziak lutte leh sorkar hnathawkte'n MUHCS 2.0 hmang turin MUHCS card an neih a ngaih thu a tarlang. CSS/GIA, pensioner leh AB PM-JAY (golden card nei)-te tan MUHCS card siam a ngai lo.

Sorkar thuchhuah tarlan danin, April 1, 2026-ah MUHCS 2.0 hman ṭan a ni a; sorkar hnathawk (a nghet leh nghet lo - govt employee leh provisional employee) leh pawisa chawia inziak lut (general beneficiary)-te chuan a taka MUHCS hmang turin MUHCS card an neih hmasak ngei a ngai a ni.

Centrally sponsored scheme (CSS) leh grants-in-aid (GIA) hnuaia thawk te, sorkar hnathawk pension tawhte leh AB PM-JAY-a awm golden card neite tan erawh chuan MUHCS card siam a ngai lo. CSS/GIA leh pensioner ten MUHCS subscription form hmangin MUHCS hnuaiah enkawlna an dawng thei a, AB PM-JAY chhungkuate'n golden card hmangin MUHCS hnuaiah enkawlna an dawng thei bawk.

MUHCS card hi common service centre (CSC)-ah emaw, damdawi-in luh rualin emaw MUHCS zawmtu damdawi-inah siam theih a ni a, muhcs.mizoram.gov.in ah mahnia siam theih a ni bawk. MUHCS card hi siam hun bituk a awm lo a, mahni remchan dana siam theih a ni.