Fu leh kurtai lama hmalakna hawng

Agriculture & Farmers Welfare minister PC Vanlalruata chuan April 2, Ningani khan Lungleng community hall-ah fu leh kurtai lama hmalakna 'Development of Jaggery Industry at Lungleng-I Village' a hawng.

Development of Jaggery Industry at Lungleng-I Village project hi 'Fostering Sustainable Development Goal no. 9' hnuaia Mizorama industry, innovation leh infrastructure tihchak zêlna tur project peng pakhat a ni a; Mizoram Science, Technology & Innovation Council (MISTIC) leh Lungleng-I Multipurpose Primary Agriculture Credit Cooperative Society Ltd. (MPACS)-te thawhhona a ni.

Project hnuaiah hian Lungleng-I khuaa fu chingtu chhungkuate chu kurtai tam zawk leh ṭha zawk an siam theih nan puihna hrang hrang a awm. Kurtai pangngai bakah, a chi dang siam ṭan a ni a, branding leh marketing lam pawh buaipui mek a ni.

PC Vanlalruata chuan, Lungleng khuain khawtlang huapa buaipui thama fu chin leh kurtai siama hma an la chu ṭanpui tlak an nih thu a sawi a; kurtai siam lamah hmasawn a hun tawh thu a sawi bawk.

Project hawnna inkhawm hi Directorate of Science & Technology chief scientific officer H Lalsawmliana'n a kaihruai a, khualzahawm Dr Lalrinchhana, Planning principal adviser-cum addl. secretary bakah, Lungleng MPACS president Lalthanpuia leh VC aiawhte pawhin thu an sawi.