KHAWTHLIR

Easter Sunday

Naktuk Pathianni hi Isua khenbeh a nih hnua a thawh lehna ni, Easter Sunday a ni a, Mizorama kohhran hrang hrangte'n an lawm dawn. Kohhran tam tak chuan naktuk zing ni chhuah rual velin mualah inkhawm - Easter Sunrise Service an hmang dawn a; chawhma, chawhnu leh zanah te biak-inah inkhawm a ni ang. Kohhran tam ber chuan thawhlehna lawm nan chawhma inkhawm bânah thingpui ruai an ṭheh dawn a ni.

TRC-in thisen pe

T Romana College NSS Unit chuan April 2, Ningani khan an college campus-ah blood donation camp an huaihawt a, Civil Hospital, Aizawl tan thisen unit 106 an pe a, petute mipa 92 leh hmeichhia 14 an ni.

Lehkhabu lehlin ṭha ber thlang

Mizo Writers Association chuan kum 2025 chhunga ṭawng danga lehkhabu ziah, Mizo ṭawnga lehlin zinga ṭha ber atan H Ngurthansanga'n Darla Milne lehkhabu 'Second Chance: Israel Narvaez' tih a lehlin chu an thlang. Lehkhabu hi Mau Mau Gang hotu Israel Narvaez chanchin a ni.

Harhna thlen ni

Vawiin April 4, Inrinni hi Mizorama harhna thlen ni champha a ni a, kumin hi harhna thlen kum 120-na a ni. Harhna thlen ni hi Mizoram Synod hnuaia tualchhung kohhrante chuan an hmang dawn a, thupui chu ‘Harhna dik chang turin sual sim a ngai’ tih a ni. Kum 1982-a Synod Inkhawmpui chuan April 4, 1906 kha Mizorama harhna thlen hmasak ní-ah a pawm a, kum 1984 aṭangin an hmang ṭan a ni.

Puanṭhui zirna MLA hoin khâr

Commerce & Industries department chuan Knitting & Tailoring Centre, DIC Champhaiah puanṭhui zirna an buatsaih a, April 1, 2026 khan khârna hun buatsaih niin, Champhai North bialtu MLA H Ginzalala'n a hmanpui. MLA hian puanṭhui zir zo mi 11 hnenah certificate leh stipend a hlan a; training-ah duhtawk mai lo a, mahnia inzir belh zel turin a fuih.

Kuhva phurh khap

Serchhip bawrhsap Paul L Khuma chuan thupek chhuahin, Serchhip district-ah dan loa kuhva phur lirthei an kal ṭhin tih hriat a nih thu leh, Serchhip district-ah dan loa kuhva lak luh leh phurh phal a nih loh thu a puang. Thupek zawm lote chu BNS 2023 Section 223 hmanga hrem theih an ni.

CIJWS tlawh

Chief secretary Khilli Ram Meena chuan April 2, Ningani khan Counter Insurgency and Jungle Warfare School (CIJWS), Vairengte a tlawh a, ram neitute nena ram inhlan chungchanga chinfel leh bawhzui ngai la awmte CIJWS hotute nen an sawiho a ni.

Kawng khâr dawn

Aizawl Traffic SP C Vanlalvena chuan hriattirna chhuahin, Falkland Venga Aizawl Bypass Road-ah kawngpui lài chata culvert phûm a nih dawn avangin, naktuk Pathianni zan dar 9 aṭanga April 6 zing dar 7 thleng Falkland Volleyball Court bulah kawngpui khâr a nih dawn thu a tarlang.