Good Friday urhsûn taka hman a ni

Kristiante ni pawimawh, Isua khenbeh a nih ní, Good Friday chu nimin khan khawvel hmun hrang hrangah hman a ni a; Mizorama kohhrante leh state pawna Mizo kohhrante pawhin urhsûn takin an hmang.

Good Friday pual hian Ningani zan aṭang khan hun hman ṭan niin, kohhran hrang hrangin 'Venpui zan' an hmang a, kohhran tam takah Lalpa Zanriah Sakramen kilho a ni. Mizoram Presbyterian Kohhran chuan Mizoram Synod aṭanga thupui thlan hmangin Pathian thuchah an ngaithla a, kohhran dangte pawhin an hmunpui aṭanga thlan thupui an nei hlawm.

Catholic kohhrante chuan Ningani zan khan Isua'n a zirtirte nen zanriah hnuhnung an kîl pualin Eucharist an buatsaih a; Isua'n a zirtir angin ke sil rawngbawlna hun an hmang. Isua inpekna leh rawngbawlna hriat reng nan puithiamte'n biak-ina inkhawmte ke an silsak a, venpui hun an hmang zui a ni.

Nimin Good Friday chhun khan Mizoram hmun hrang hranga Catholic kohhrante chuan Isua'n Kalvari tlang pana kraws a put hriat reng nan Kraws Kawngzawh an buatsaih a, biak-inah lutin, an inkhawm zui nghal.

Good Friday hi March 20 leh April 25 inkara thla bial hnaih ber Zirtawpni-ah hman ṭhin a ni a, chumi dawta Pathianni hmasa ber chu Easter Sunday a ni. Good Friday/ Easter Sunday hma chiah Pathianni chu Tûmkau Ni (Palm Sunday) a ni a; Easter Sunday aṭanga chhiara ni 50-na chu Pentikos Ni a ni bawk. Good Friday hi thla bial lai hun aṭanga chhût a nih avangin ni (date) bik a awm lo.