CM-in Serchhipah Dialysis Unit a hawng

Chief minister Lalduh-oma chuan nimin khan a bial chhunga Serchhip District Hospital-ah Dialysis Unit thar a hawng a; thawktute inthlahdah vanga damlote tawrhna thleng lo se a duh thu a sawi.

CM Lalduhoma chuan, dialysis khawl chuan ṭha taka hna a thawh theih nan mamawh dang la awm angte ngaihtuah belh zel a nih dawn thu a sawi a, "A thawktu turte'n theitawp chhuahin, Pathian rawngbawlna a ni tih hre chungin lo thawk u la, natna khirh tuar, inenkawlna nei si lo an lo kal pawhin lo ngaihsak hram hram rawh u. Thawktute inthlahdah vanga damlote tawrhna thleng lo se, hah chung chung pawhin, nunna chhanna a nih avangin lo thawk hram zel ang che u," a ti.

Mizo zingah AIDS, cancer leh natna khirh tak tak vei an tam tih sawiin Lalduhoma chuan, "Kan duh kan thlang sual deuh em ni aw a tih theih a, natna tam tak kan pumpelh theih a awm a, kan nun kan uluk hi a ṭul a ni. Pathian hian kan hrisel a phal a, kan hausakte pawh a phal," a ti a, damna chu Pathian hnenah a awm thu a sawi.

Chief Minister chuan, Serchhip damdawi-in sak mekin hma a sawn ve zel thu te, main building sakna tur cheng vbc 50 dawn a nih tawh thu leh, tender chhuaha hna thawh chhunzawm thuai a nih tur thu a sawi bawk.

Tarlan danin, Dialysis Unit khawl hi kum 2025 khan Serchhip District Hospital-in an dawng a, thawktu doctor pakhat, technician pakhat, nurse pahnih leh RO incharge pakhatin an enkawl dawn. Vawiinah dialysis tih ṭan nghal an tum. Dialysis khawl bunna atan MLA fund Rs 15,04,000 leh technician hlawh tur Rs 1,38,000 an hmu a ni.