VB-G Ram G atan scheme duang tawh; State sum vbc 128 vel hman a ngai dawn

Ni 100 inhlawhna tia hriat ṭhin, Mahatma Gandhi National Rural Employment Guarantee Act 2005 (MGNREGA) thlâkna tur Viksit Bharat-Guarantee for Rozgar and Ajeevika Mission-Gramin (VB-G Ram G) atan scheme duan a ni tawh a; scheme kalphung thar atan hian state sum cheng vbc 128 vel hman a ngai tura chhût a ni.

Vanglaini palai zawhna chhangin Rural Development minister Prof. Lalnilawma chuan, sorkar laipuiin VB-G Ram G atan scheme duang tura a tih thu a sawi a, "Sorkar laipui thu bawhzui hian department chuan scheme kan duang a, kan tifel tawh. Tunah hian Law & Judicial department pawmpui (vet) turin kan thawn tawh a, an pawmpuina nghah mek a ni," a ti.

Prof. Lalnilawma chuan, sorkar laipuiin guideline an siam dawn leh dawn loh a la chian loh thu sawiin, "Chutihrualin, MGNREGA hnuaia job card neite chu VB-G Ram G-ah thun luh tur an ti," a ti a; tih dan tur an zawh chin bak sorkar laipui aṭangin thil chiangkuang tak an la dawn mumal loh thu a sawi.

VB-G Ram G-ah sum senso a san dawn thu sawiin RD Minister chuan, "MGNREGA-ah hian sorkar laipuiin hna thawktute hlawh tur (wages) 100%-in a rawn tum a, material component-ah chauh state-in kan tum ve. Tunah chuan wages leh material component ṭhen hrang tawh loin, Mizoram sorkarin kan tum ve tur 28%-ah an rawn ti tawp," a ti.

Prof. Lalnilawma chuan, VB-G Ram G-ah ni 125 inhlawh tura tih a nih angin, sum mamawh tur angte an chhût tawh thu a sawi a, "Ni 125 inhlawhna atan hian kan tum ve tur chu cheng vbc 128 vel ni turin kan chhût," tiin, sum mamawh zat tur chu Cabinet meeting-a sawiho tura an buaipui mek thu a sawi.

RD Minister sawi danin, sorkar kum liam ta 2025-26 chhung khan MGNREGA hnuaiah Mizoramah ni 100 inhlawhna siam hman a ni.