MRB-in CSR aṭangin thil pek an hlân

Mizoram Rural Bank (MRB) chuan an corporate social responsibility (CSR) kaltlangin nimin khan MJA leh Labour, Employment, Skill Development and Entrepreneurship (LESDE) hnenah computer eng emaw zat an hlan.

MRB hian MJA hnenah computer panga an pe a, ITI, Aizawla hman turin LESDE depatrment hnenah computer 24 leh A3 printer pakhat an pe thung. Thilpekte hi MRB Chairman-in MJA president C Lalrambuatsaiha leh LESDE aiawhin ITI, Aizawl hotute a hlan a ni.

Thilpek inhlanna hi MRB Head Office Board Room-ah neih a ni a; MRB chairman Sheryl L Vanchhong chuan, Company Act hnuaiah bank leh company ten an hlêp aṭangin mipui tan CSR pek chhuah ngei ngai mah se, regional rural bank-te chu a huam ve loh thu a sawi a, "CSR chungchangah Company Act-in min huam lo mah se, MRB chu Mizote bank a nih avangin Mizote tan luan chhuah kan duh a, CSR kan pe chhuak ve ṭhin a ni," a ti.

Sheryl Vanchhong chuan, Mizoram sorkar policy Bána Kaih hnuaia loan pek tur zinga 70% vel chu MRB-in an pek tur a nih thu a sawi a; loan an pek nasat thu leh, private bank-te'n an pek ngam lohnaah pawh loan an pek nasat thu a sawi bawk.

Inkhawm kaihruaitu MRB CSR Committee secretary V Lalrinmawia tarlan danin, sorkar kum 2025-26 chhungin MRB-in pawl, khawtlang leh sorkar department/pisa hrang hrang tan cheng nuai 121 hu vel thil an pe chhuak a ni.

Nimin vêk khan MRB chuan Higher and Technical Institute, Mizoram (HATIM), Lunglei hnenah smart interactive board, inches 65-a lian an hlan a; Champhai SP Office hnenah computer leh printer pathum ve ve an hlan bawk.

MRB-in nimina thilpek an pek chhuahte hi a vaiin Rs 19,94,220 hû a ni.