Mizoram pawn aṭanga sangha lak luh ngai loin intodelh theih a ni - Lalthansanga

Fisheries minister Lalthansanga chuan, Mizoramah sangha khawi theihna ram hectare 4,500 aṭangin hectare 1,000 chiah hman ṭangkai a nih thu sawiin, Mizoram pawn aṭanga sangha lak luh ngai loa a intodelh theih a nih thu a sawi.

Minister hian March 28, Inrinni khan Champhai District Fisheries Development Office leh Keilungliah Reservoir Management Committee ṭangkawpin Keilungliaha Nghakuai Chiah Rûnpui (Fish Festival) an buatsaih khârna a hmanpui a; thu sawiin, "Mizoramah sangha khawi nana hman theih ram hectare 4,500 a awm laiin, hectare 1,000 chiah la hman ṭangkai a ni a, sangha khawitu pawh kan la tam tawk lo. Mizoram hian hmun dang aṭanga sangha lak ngai lo turin kan intung ding thei a, ṭan kan lak a ṭul," a ti.

Bána Kaih hnuaia ṭanpuina bakah, PMMSY hnuaiah hamṭhatna a awm thu sawiin Lalthansanga chuan, "Sangha dil ṭha tak siama ṭha taka eizawnna insiam thei turte tan chuan heng hamṭhatna hi lak ngei a ṭha," a ti. Keiluangliaha Nghakuai Chiah Rûnpui buatsaih a ni chu ṭha a tih chu sawiin, nghakuai chiah bakah thil dang tam tak tih theihna atan Keilungliah hi buatsaiha thuam ṭhat zel tum a nih thu a sawi bawk.

Nghakuai Chiah Rûnpui khârna inkhawm hi Fisheries secretary Lalrothanga'n a kaihruai a; district fisheries development officer Lalremsangpuii'n pawhin thu a sawi. Minister hian Nghakuai Chiah Rûnpui puala intihsiakna hrang hranga ti ṭhate hnenah lawmman a sem a ni.