Gas leh oil vil tur leh dik lo taka hralh a nih loh nan hma la turin DC-te hriattir
Chief secretary Khilli Ram Meena chuan, district bawrhsap tinte chu an huam chhung ṭheuhah eirawngbawlna gas leh tuialhtheite dik lo taka chhehrelh a nih loh nan hma la turin a hriattir a; dik lo tak thil tite sorkar hotute hnenah hriattir turin mipui a chah.
Chief Secretary chuan thuchhuah siamin, DC-te chu eirawngbawlna gas leh tuialhthei awm zat leh sem chhuah dan uluk taka vil tur te, chhehrelh a nih loh nan leh man to zawka hralh (black marketing) a nih loh nan hma la turin a hriattir a, "District hotute chuan dan bawhchhia an awm a nih chuan Essential Commodities Act, 1955 hmangin an lakah hremna khauh takin an lekkawh tur a ni," a ti.
LPG leh diesel/petrol sem chhuah chungchanga harsatna an tawh emaw, chhêk ru leh man to zawka hralh an hriat chuan state leh district-a sorkar hotute'n helpline number an siamah thlen tur leh, LPG stock awm sa renchem taka hmang turin mipui a chah bawk.
Chief Secretary chuan, sorkar laipuiin Ministry of Petroleum & Natural Gas (MoPNG) kaltlangin ram chhung hmun hrang hranga eirawngbawlna gas leh tuialhthei lak luh leh sem chhuah dan uluk takin a thlithlai reng tih a tarlang a, "MoPNG chuan state sorkar zawng zawngte hnenah hmun hrang hranga heng ni tin ei leh bar mamawh tlachham an awm loh nan khauh taka vil reng turin thupek a chhuah bawk," a ti.
Khilli Ram Meena chuan, March 27, 2026 khan Prime Minister hoa state hrang hrang Chief Minister leh Chief Secretary te ṭhutkhawmnaah, mipui mamawh lak luh leh sem chhuah dan uluk taka en zui reng a pawimawhzia uar taka sawi a nih thu a tarlang a; eirawngbawlna gas leh tuialhthei tam tâwk tak a awm a ni tih leh ngaihṭhat loh emaw, chîâina chhan tur emaw a awm lo tih mipuite hriattir an nih thu a puang.
Chief Secretary tarlan danin, March 28, 2026 khan Food, Civil Supplies & Consumer Affairs department hotu te, DC zawng zawngte leh oil marketing company-te an ṭhukhawm a; DC-te hian an district chhung ṭheuhah LPG, petrol leh diesel a tam tâwk tih an sawi a ni.