Vairengte-Sairang kawng ngaihsak turin LS MP-in sorkar laipui a ngen

Lok Sabha MP Richard Vanlalhmangaiha chuan nimin khan Parliament budget session-ah thu a sawi a; Mizoram châk lakna kawngpui siam mek chu chak zawka thawh a nih theih nan leh, Vairengte - Sairang inkar chu kumin fûr hmaa siam zawh a nih theih nan ngaihsak turin sorkar laipui a ngen.

Richard Vanlalhma-ngaiha chuan, Vairengte - Sairang inkar kawng chungchang sawiin, "Kum hmasa lamah fûr laiin kan tuar nasa hle a, tunah pawh hna a muan avangin hetianga an thawh chuan kumin fûr hmain an thawh zawh hman loh a hlauhawm a ni," a ti.

Vairengte - Sairang chu NHIDCL enkawl leh Balaji Constructions, Jandhu Constructions leh BR Goyal Contructions company-te'n an siam mek a nih thu sawiin Lok Sabha MP chuan, "NHIDCL official-te ka sawipui tawh. Mizoram mipuiin kum hmasa lama harsatna kan tawrh ang tawrh kan duh tawh lo. Hei vang hian Mizoram aiawha dingin, Ministry lam pawhin he hna hi ṭha leh felfai taka an zawh theih a, kumina harsatna kan tawh lohna turin min ngaih pawimawhsak turin ka ngen a ni," a ti bawk.