Kan ram nuam tak hi khawvelah kan târ chhuak dawn - Tourism Minister

Tourism minister Lalnghinglova Hmar chuan, Mizoram chu ram nuam tak a nih thu sawiin, khawvel zau zawkah tàr chhuah a nih dawn thu a sawi.

March 17, Thawhlehni tlaia State Institute of Rural Development and Panchayati Raj-a ‘District Level Tour Guide’ training a hawnnaah Tourism Minister chuan, "Kan ram nuam tak hi thawnthu mawi tak sawi chung zelin, khawvel ram zau zawkah kan târ chhuak dawn a ni," a ti.

Lalnghinglova Hmar chuan, training-a telte chu tourism an tuipui avangin a ngaihlut thu sawiin, "Experience nei ṭha tak tak leh la nei chiah lote kan ni hlawm," a ti a; tourism sector chu eizawnna zahawm tak a nih theih nan theihtawp chhuah tlan a ngaih thu a sawi.

Tourism Minister chuan, khualzin tih chuan state pawn aṭanga rawn kalte chauh ni loin, Mizote pawh Mizoram chhungah khualzin an nih theih thu a sawi a, "Kan tei kualnaah kaihruaitu ṭha kan neih chuan kan hmunhma hmuhte a hlu zual ṭhin," a ti a; trainee-te chu an theihna leh thiamna te Mizoram hmasawnna atan hmang turin a chah.

Tour guide-te tana training hi Bána Kaih hnuaiah Tourism department-in khualzinte mumal zawka enkawl an nih theihna tura a duan a ni a, mi 110 tan ruahman a ni. Training ṭan tak hi batch hmasa ber niin, mi 40 an tel phawt dawn a, batch dang pahnih la awm tura beisei a ni.