Saitual khawpui tan RoR sem a ni

Land Revenue & Settlement (LRS) minister B Lalchhanzova chuan nimin khan LRS Directorate conference hall-ah Saitual khawpui huam chhunga khaw paruk zir chian zawh tawhte Record of Rights (RoR) a sem a; minister of state Prof. Lalnilawma, bialtu MLA-in a hmanpui.

B Lalchhanzova chuan, Saitual khawpui huam chhunga mite tan RoR sem a ni ta chu kalphung thar a nih thu a sawi a, "RoR-ah hian ram chungchanga hriat ngai leh ṭulte a awm vek a, a felfai zawk bakah, LSC tihbo vanga buai viauna tur a awm tawh lo. Saitual district-a khua la survey loh 28-te pawh drone hmanga survey zawh tawh a ni a, rei lo têah property card 4,423 sem thuai a ni ang," a ti.

LRS department-ah thil thar leh tih dan tharte an kalpui mek zel thu sawiin Minister chuan, "Department-a ka thawhpuite ṭhahnemngaihna avangin SASCI Part VII-A hnuaiah mellung pawimawh ULPIN generation, mobile number & address seeding leh vawiina kan sem mek standardised RoR hman avangte hian incentive cheng vbc 29.57 kan hmu leh thei hi a lawmawm tak zet," a ti a, hmalakna tur a la tam thu a sawi bawk.

Saitual khawpui huam chhunga re-survey hian VC area paruk a huam a; RoR awm zat chu Sihfaah 285, Keifang Venghlunah 476, Keifang Venglaiah 164, Keifang Leitanah 364, Rulchawmah 361 leh Ruallungah 238 niin, a vaiin 1,879 a ni. RoR 1,879 zinga 1,670 chu peih tawh niin, a dang 209 chu document la fel kim loh vangin la pek chhuah theih a la ni lo. RoR-te hi a neitute'n Saitual DC pisaa Revenue Branch aṭanga an lak theih tura ruahman a ni.