B.Ed. in Special Education a awm theih nana hmalak rêl

Social Welfare, Women & Child Development minister Lalrinpuii hoin March 17, Thawhlehni khan State Advisory Board on Disability chuan Mizorama rualbanlote tana hmalak dan tur an sawiho a; B.Ed. in Special Education a awm theih nana hmalak an rel.

Minister Lalrinpuii chuan, rualban-lohna chi a pung zel tih sawiin, "An hamṭhatna humhalh leh hmasawnna turte ngaihtuah zel chu Chief Minister nena kan ngaih pawimawhte zinga lian tak a ni," a ti a; Commissioner for Persons with Disabilities chu dinhmun pawimawh tak a nih thu leh a mamawhtute tan Chaltlang Field kawnga an pisa pan theih reng a nih thu a sawi.

Ṭhutkhawmah hian Mizorama special school-te tihchangtlun te, Durtlang Primary School-II chu special school atana hman te, B.Ed. in Special Education a awm theih nana hmalak te, rualbanlote tana ṭanpuina chi hrang hrang ennawn te, rualbanlo zirlaite tana reader and scribe allowance pek dan tur te, rualbanlote tan bika healthcare scheme duan te, enkawl ngai bikte tana hamṭhatna tur te, Government e-Office platform chu rualbanlote tana awlsam zawka hman theiha siam leh, WCD department-in rualbanlo hnuchham naupang a enkawl mekte tana hamṭhatna turte an sawiho a ni.