Mizo infiamna hmanga inelna ṭan a ni

Doordarshan Aizawl leh Mizoram Indigenous Games Association (MIGA) chuan nimin khan Ramhlun Sports Complex-ah Doordarshan Mizoram Indigenous Games & Cultural Festival an buatsaih ṭan a, Art & Culture minister C Lalsawivunga’n a hawng.

Mizoram Indigenous Games & Cultural Festival hi Mizo infiamna chi hrang hrang hmanga inelna leh intihhlimna a ni a, March 20, 2026 thleng neih a ni dawn. Mizo inbuan, insuknawr, insaihruipawh, inarpasual, kalchhet, invàwr leh kàwikah hmangtein inelna buatsaih a ni a; zan lamah zaithiamte nen hun hman ṭhin a ni ang.

Art & Culture Minister chuan, Mizo nunphungte ngaihsan a, ngaihlut a, vawn nun zel a pawimawh thu sawiin, "Indigenous games hian Mizo kan nih anga kan tih dan, kan nunphung, kan culture-a bet tlat infiamna kan chawi nung thar leh dawn a, a hlu hle a ni," a ti.

Tunlaiah infiamna chi hrang hrang khawvel pum huap leh India pum huapin a awm chho zel tih sawiin Minister chuan, "Mizote hian pi leh pu aṭanga kan tih ve dan kan infiamna hi kan theihnghilh lek lek tawh tih theihin a awm," a ti a; Doordarshan leh MIGA ten Mizo infiamnate chawi lâr tuma hma an la chu lawmawm a tih thu a sawi.

C Lalsawivunga chuan, hnam nunphung leh ei leh in te a danglam zel tih sawiin, "Hmasawn tur kan ni a, hmasawnna kawng zawh hi kan nihna tur leh kan tih tur pawh a ni. Amaherawhchu, kan nunphungte a inthlakah hian pi leh pute aṭanga kan chìn ṭhin thil ṭhate kan chawi lâr thiam a pawimawh. Ṭhangtharte'n Mizo infiamna chi hrang hrang te, chìn dan ṭha zawk leh Mizo culture te an hriat thar a ṭul," a ti.