KHAWTHLIR
END-in thisen pe
Excise & Narcotics department chuan an department golden jubilee an lawm mek pualin nimin khan Aizawl leh Lungleiah thisen an pe. Aizawlah chuan ZMCH tan unit 55 pein, petute mipa 47 leh hmeichhia pariat an ni a; Lunglei leh Hnahthiala END mi leh sate'n Civil Hospital, Lunglei tan unit kua pein, petute mipa pasarih leh hmeichhia pahnih an ni.
Lirthei hlan
Mission Foundation Movement bultumin March 17, Thawhlehni khan Indian Oil Corporation corporate social responsibility sum hmanga lei, multipurpose utility vehicle chu Saitual Chief Medical Officer pisa hnenah hlan a ni a; inhlanna hun hi bialtu MLA Prof. Lalnilawma'n a hmanpui. Lirthei hi hmun harsa leh kilkhawr zawka health check-up neihna atan te, immunisation leh vaccine sem nantea hman tur a ni.
Ruihhlo hâl ral
Nimin khan Lunglei AP Tlanga Incinerator Centre-ah Lunglei District Disposal Committee chuan heroin leh ganja eng emaw zat an hâl. Ruihhlo hâlte chu Rs 4,85,800 hû heroin gram 28 leh Rs 4,86,000 hû ganja kg 8.330 a ni a, Lunglei SP J Lalmuankima kaihhruaiin hâl a ni.
MLA-in hawng
Aizawl South-II bialtu MLA Lalchhuanthanga chuan nimin zing khan a bial chhunga a MLA fund hmanga siam Tlangnuam Primary School-III in zauh a hawng. Lalchhuanthanga chuan, zirna a ngaih pawimawh thu sawiin, a biala sikul hrang hrangte MLA fund hmanga a chhawmdawl tawh ṭhin thu leh, theihtawp chhuah zel a tum thu a sawi.
Blood bank sawn
Civil Hospital, Aizawl Blood Centre chu nimin aṭang khan Block A-a Casualty/Emergency awmna ṭhinah an insawn ṭan a, hei vang hian nimin leh vawiinah thisen pek (donate) theih a ni dawn lo. Thisen lak chhuah erawh a theih reng thung ang. Civil Hospital hotute chuan, mipui hriatthiamna an ngen a, naktuk Zirtawpni aṭangin thisen pek ṭan leh theih a nih tur thu an tarlang.
Advisory Committee
Vawiin hian Mizoram Electricity Regulatory Commission huaihawtin Aijal Club-ah State Advisory Committee an ṭhukhawm dawn. March 20, 2026 khian kum 2026-27 atana electric hman man chungchangah public hearing buatsaih a ni bawk ang.