Eirawngbawlna gas-ah chiai lo tur leh ṭul loa chhekkhawl lo turin mipui chah

Food Civil Supplies & Consumer Affairs (FCSCA) department chuan thuchhuah siamin, eirawngbawlna gas-ah chiai lo tur leh chhekkhawl lo turin mipui an chah.

FCSCA dept chuan, tunlai khawvel geo politics boruak avangin mipuiten eirawngbawlna gas-ah harsatna an tawh loh nan India sorkar chuan theihtawpin hma a la reng tih tarlangin, "State sorkar pawhin mipuiten harsatna an tawh loh nan chak takin hma a la reng a ni. Tun dinhmunah ni tina Mizoram mipui mamawh zat LPG chu bûr 7,900 vel a ni a, LPG Distributor hrang hrangah harsatna lian tham awm loin LPG a thleng mek zel," an ti.

Mizoramin LPG a lak luhna IOCL Bottling Plant, Borkhola-ah pawh harsatna awm loin Mizoram mamawh ang tâwk lak zel a la nih thu tarlangin FCSCA dept chuan, "India sorkarin mipuiten ṭul loa LPG bûr an chhekkhawl loh nan LPG booking tih hnuhnun ber aṭanga booking tih leh theih hun inkar chu ni 25-ah a rawn bituk thar," an ti a, hetiang boruak kaihhnawihah hian mi duham ṭhenkhatin ṭul loa LPG bur an chhekkhawl leh, man to zawka dan loa an hralh chhawn loh nana hma la turin sorkarin State Level leh District Level Monitoring Cell a din thar tih an tarlang.

FCSCA dept chuan, State Level leh District Level Monitoring Cell hian mipuiten an chanvo dik tak leh a mamawh tak tak ten LPG bur an dawn theih nan hma an la dawn tih tarlangin, "Hetianga chak taka state sorkarin hma a lak avang hian mipuite chiai lo tur leh, ṭul loa LPG chhekkhawl lo turin sorkarin mipuite a ngen tak meuh meuh a, LPG pawh renchem taka hmang turin mipuite a ngen bawk a ni," an ti.