Assam inthlan dawn avangin boruak ṭha lo inmung a awm loin kan hria - Home Minister

Home minister K Sapdanga chuan, Assam state assembly inthlanpui a awm dawn avangin boruak ṭha lo inmung a awm loa an hriat thu nimin khan Assembly House a hrilh.

MNF member Lalchhandama Ralte zawh belhna chhangin Home Minister chuan, "Tun hnaiah border out post hnuhdawh a awm loin ka hria. Kan hnuhdawh hnuhnung ber chu kum 2023-ah a ni a, chu pawh a hmunhma siamṭhat a ngaih avang a ni. An luah leh theih thuai kan beisei. Border out post zawng zawng puan kaih ni ṭhin rangvain kan thlak," a ti.

K Sapdanga chuan, ramri-ah boruak ṭha lo a awm loh nan ramri bul DC-te an hnaih DC-te nen inbe tura hriattir an nih thu sawiin, "Infiamna leh cultural meet te neiho tura tih an ni a, an zâwm ṭha viauin kan hria. Tun thleng chuan Assam inthlan dawn avanga boruak ṭha lo inmûng a awm kan hre lo," a ti a; ramri-ah buaina a awm loh nan sorkarin theihtawp a chhuah zel thu a sawi.

Tun hnaia Saiphai ram Assam lamin an vah chungchangah Home Minister chuan, "Kolasib DC-ah complaint a lut a, kan hriat veleh Kolasib DC leh SP te a hmunah an kal nghal a, border out post aṭangin darkar li kea kal ngai a ni. Ṭín 70 aṭanga 80 vel an vatah kan ngai. A vattute zawn a ni a, Silchar DC hnenah kan thlen nghal. Vât tawh pawh ni se, chhunzawm tawh lo turin kan ti. Silchar DC pawhin zawm a tiam," a ti.

Home Minister-in MNF member K Laldawngliana zawhna a chhan danin, tun dinhmunah police officer lirthei dawng 150 an awm. Mizorama police station hrang hrangah lirthei 113 a awm a; police station 44-a lirthei awmte chu an buai dan azirin a enkawltu tur driver awm zat tur chu district SP-te'n felfai takin an ruahman ṭhin a ni.