Waste to Wealth Exhibition buatsaih

Mizoram Pollution Control Board (MPCB) chuan nimin khan Dawrpui Multipurpose Hall-ah sikul leh college-a eco-club-te pualin thil/bungrua hluihlâwn tawh aṭanga thil hlu leh ṭangkai dang siama inelna leh pho lanna, Waste to Wealth Exhibition cum Competition a buatsaih.

Exhibition cum Competition-ah hian Mizoram hmun hrang hranga zirlaite'n thil hlui chi hrang hrang hmanga thil an siamte an pho chhuak a; zirlaite chu hlawm thum - primary & middle school, high school & higher secondary school leh, college leh a chung lamah ṭhen an ni. Category tina ti ṭhate hnenah MPCB chairman Liankima Lailung-in lawmman a hlan.

MPCB chuan, Exhibition cum Competition-in a tum ber chu, zirlaite hnena bawlhhlawh neih tlêm pawimawhna zirtir leh bawlhhlawh nei tlêm tura thil duh tawh lohte paih mai loa thil ṭangkai danga hman ṭangkai dan (re-use) kawhhmuh a ni tih an tarlang.