Saipum ramah Assam mite'n ram an vât; Kolasib-a sorkar thuneitute'n an ngaihven

Tun hnaiah social media-ah Assam lam mi ṭhenkhatin Saipum ram chhungah lo an vât nia thehdarh a ni a; hei vang hian Kolasib bawrhsap Robert C Lalhmangaiha leh SP Lalrinpuia Varte te chuan nimin khan Saipum khua tlawhin, khawtlang hruaitute nen thil awm dan an sawiho. Bawrhsap chuan, a ṭul ang zela hma la turin sorkar a inhuam thu a sawi.

Sorkar thuchhuah tarlan danin, Saipum khawtlang hruaitute chuan, hnam dangte'n ram an vahna hmun chu a hma chuan Mizoram police-te duty-na ṭhin, Chawilung Camp awmna hmun a nih thu an sawi a; kawng chhiat vanga Mizoram police duty an awm loh hnuah venhimna a chak lo a, chu chu Assam lamin remchangah lain an rawn zuam ta nia an ngaih thu an sawi bawk.

Saipum khawtlang hruaitute chuan, Assam lamin ram an vahna lai chu Saipum ram ngei a nih thu an sawi a; Assam lam aṭanga hmalakna a kal tlang zel a nih chuan nakin zelah ramri buaina lian zawk a chhuah theih dawn thu sawiin, a hma thei ang bera hma la turin sorkara thuneitute an ngen.

Robert C Lalhmangaiha chuan, Assam lam chetna chu Mizoram sorkarin a ngai pawimawh thu sawiin, "Buaina leh inepna chhuak loa boruak muanawm tak hnuaia chinfel a nih theih dan kawng zawn a ṭul hmasa a ni," a ti a; a ṭul ang zela hma la turin sorkar a inhuam thu a sawi.