Ex-MNA-in Mizoram independent puan diamond jubilee an lawm

Ex-Mizo National Army chuan nimin khan Chanmari YMA Hall, Aizawlah zalenna sual laia hnam sipaia ṭang tawhte pualin Mizoram independent puan diamond jubilee an lawm.

Hun hmanpuitu MNF senior vice president Dr R Lalthangliana, MLA chuan, zalenna sualtute chu ram leh hnam tana an inpeknaah lawmthu a hrilh a, "Nationalism chi nung ṭhangtharteah kan tuh zel a, a lo par vul zel hi a ṭul hle a ni," a ti.

Zalenna sual laia Army chief ṭhin Tawnluia chuan, kum 1966-ah Laldenga kaihhruaina hnuaiah zalenna an puang tih sawiin, "Independent an sual lo, tia MNF sawi ṭhinte hian an hre sual a, thu dik lo an sawi ṭhin. Zalenna kha chiang takin kan sual a, kan martarpui a ni. Kan theihna zawng zawngin Zoram zalenna nan kan thawk a, kan inpe a ni," a ti a; zalenna an sualnaah martar tam tak an awm thu a sawi.

Mizoramin zalenna a neih a, mahni kea a din theihna tura beitu zawng zawng an hre reng a, zahna chibai a bûk thu sawiin Tawnluia chuan, "Independent puan aṭangin India leh khawvelin Mizo hnam min hriat phah a, zalenna sual nachang hre hnam, mahni dikna atana bei ngam hnam kan ni hi min zah phah hle a ni," a ti.

Tawnluia chuan, ram a buai hnua remna leh muanna a awm theihna tura nawrtu ṭhenkhatte'n 'MNF an in surrender' tia an sawi zui thu sawiin, "MNF kha kan in surrender lo a, kohhran leh mipui ngenna leh nawrna avangin India nen inremna kan siam mai a ni," a ti bawk.

Inkhawm hi Ex-MNA president Rochungnunga'n a kaihruai a, MNF Lt. Lalchamliana, MNF National Core Committee member-in thu a sawi bawk.