KHAWTHLIR

Renchem turin ngen

Food, Civil Supplies and Consumer Affairs department chuan eirawngbawlna gas leh tuialhthei ren turin mipui an ngen. FCSCA thuchhuah chuan, "Ministry of Petroleum and Natural Gas, Govt. of India-in thuchhuah a siam angin LPG (gas), petrol leh diesel hman tur India ramin stock a la nei hnianghnar a, chutihlaiin, tunlai boruak vanga harsatna kan tawh loh nan mipuite'n kan gas, petrol leh diesel kawl laite renchem taka hmang turin kan inngenin kan inhriattir e," a ti.

Souvenir tlangzarh

ZPM vice president C Lalnunnema chuan nimin khan Lunglei district-a Bunghmun khaw kum 125-na puala souvenir lehkhabu buatsaih chu Bunghmun YMA Hall-ah a tlangzarh. C Lalnunnema chuan, Bunghmun awmna bial chu opposition bial ni mahse sawrkarin a ensan loh thu leh, inkalpawhna kawngpui ṭha siam turin sorkarin hma a lak thu a sawi.

Zangnadawmna pe

Kum 2024 chhunga Saitual district-a vawk pûl hri, African Swine Fever (ASF) vanga vawk suat neitu chhungkaw 126 hnenah March 11, Nilaini khan zangnadawmna pek kim a ni. Kum 2024 chhung khan ASF vangin Saitual district-ah vawk 781 suat a ni a, zangnadawmna pek hi Rs 44,93,40,224 a ni.

Lei tlahniam enfiah

Mizorama leimin leh lirnghing chungchang zir chiang tura rawn zin AMRITA University technical team chuan nimin khan Khawzawl Vengthara lei tlakhniamna hmun an enfiah. An hmuh dante chu Khawzawl additional DC K Zorammuana, Khawzawl DDMA chief executive officer ni bawk hnenah an thlen nghal a, hmalak chhunzawm dan tur sawiho a ni.

Ran hriselna endik

Mizoram State Veterinary Council leh State Veterinary Polyclinic Hospital, Khatla chuan nimin khan Reiek leh Ailawngah a thlawna ran hriselna endikna, Free Animal Health Camp an buatsaih. Camp-ah hian vawk 42, ui 30, ar 168 leh zawhte pakhat endik a ni a, a thlawnin damdawi sem a ni.