HBC-ah PoliSci Connect Festival buatsaih

Mizoram Youth Commission (MYC) bultumin Hrangbana College-a Department of Political Science chuan nimin khan 'PoliSci Connect (Political Science) Festival & Promotion of Reading Culture' an buatsaih a; MYC chairman Malsawmzuala Ralte-in a hmanpui.

PoliSci Connect Festival & Promotion of Reading Culture-ah hian HBC-a political science major zirlai bikte pualin public speaking leh quiz inelna buatsaih a ni a; 'Border fencing hian Zo fate inpumkhatna a tiharsa' tih thupui hmangin inhnial a ni.

Malsawmzuala Ralte chuan, MYC-in ṭhalaite tan theihtawp a chhuah a, UPSC exam atan free coaching leh MPSC exam atan group A leh B coaching a kalpui thu sawiin, "Tunah hian Taiwan sorkar nen inremna siamin, Taiwan-a thawk turin Mizo ṭhalai 50 - 100 tirh tum mek a ni a, hotel management-ah crash course-buatsaih a nih bakah, British Army-ah Mizo ṭhalaite luh theihna atan kawng kan zawnsak reng," a ti a; book club ṭha deuh neiin zirna-in leh kohhran hrang hrangah lehkha chhiar pawimawh zia inzirtirna an kalpui mek thu a sawi.

MYC secetary V Lalmuanpuii'n Promotion of Reading Culture chungchang a sawifiah a; HBC principal Lalthlengliana Hrahsel pawhin thu a sawi bawk.