Aizawlah NERPC Meeting neih a ni

North Eastern Regional Power Committee (NERPC) Meeting vawi 31-na chu nimin khan Youth Recreation Centre, Aizawlah neih a ni a; Power & Electricity minister F Rodingliana’n hmanpuiin, Mizoramin kawlphetha siam chhuah theihna hmun a neihah hmalak mek zel a nih thu a sawi.

F Rodingliana chuan, Mizoram chu Ministry of New & Renewable Energy-in tun hnaiah hmarchhaka che ṭha ber pawl (best-performing states) zingah a puan thu a sawi a, "Mizoram hian hman ṭangkai loh hausakna a nei tam a, CWC survey report-ah pawh Mizoramin hydro power megawatt 3,660 siam chhuah theihna a neih thu te, pumped storage project-ah MW 10,000 aia tam siam chhuah theihna a neih thu te, NISE report-ah nizung chakna aṭangin GW 9.09 siam chhuah theihna a neih thute tarlan a ni," a ti.

PE Minister chuan, sorkar laipuiah power sector bik tan Gross Budgetary Support (GBS) chu 10% aṭanga 20%-a dah turin leh ramngaw hman man Net Present Value (NPV) rate sang lutuk chu tihhniam sak tura a lo ngen tawh thu a sawi bawk.

NERPC chairman Metbah Lyngdoh, Meghalaya Power minister pawhin thu sawiin, hmarchhak biala kawlphetha lakna leh sem chhuahna (transmission & distribution)-a hloh tam lutuk chu a ngaimawh thu a sawi a, "India ram average aiin kan sang a, ṭan kan lak nasat a ngai. Hmasawnna hna thawh nana forest hman man/tihchereu man NPV charge sang lutuk hian hmarchhak bial, forest cover tamna ramte tan hmasawnna hnathawh a tiṭhuanawp nasa hle a ni," a ti.

NERPC member-secretary B Lyngkhoi chuan, NERPC chu mipui tana kawlphetha rintlak leh man tlawm zawk a awm theihna tura inrawnkhawmna pawimawh ber a nih thu a sawi a; hmasawnna hna hrang hrang thawhnaah power sector chu a hmahruaitu a nih a ṭul thu a sawi bawk.

Ṭhutkhawmah hian hmarchhak state hrang hrang hotute leh mithiamte an tel a; kawlphethaa intodelhna tur te, kawlphetha leh ruhrel lama hmasawnna tura hmalakho theih dan tur te, India hmarchhaka ramngaw leh tui chaknate hlâwk leh dik taka hman a nih theih dan turte sawiho a ni.

MIZORAM HMALAKNA TARLAN ṬHENKHAT

- Kawlphetha MW 24 siam thei tur Tuirini Hydel Project chu NDB fund hnuaiah hna thawh ṭan a ni tawh.

- Tuivai HEP (MW 132) leh Tlawng HP (MW 102) atan detailed project report peih thawkhat a ni.

- December 2025 khan Thenzawl Solar Plant (MW 10) hawn a ni.

- Sumsuihah MW 5 solar plant siam mek a ni a, MW 46 dang siam leh turin tender buaipui mek a ni.

- Chite Sub-Station leh 132kV Bairabi-West Phaileng line-te hawn a ni tawh.

- Lawngtlai, Marpara, leh Thingsulthliah sub-station tharte March 2026 hmaa zawh hman tum a ni.

- RDSS scheme hnuaiah prepaid smart meter leh aerial bunch cable te Aizawlah hman ṭan a ni.