2025-ah hectare 550-ah sapthei chìn belh

Horticulture minister C Lalsawivunga chuan, kum 2025 chhung khan Mission for Integrated Development of Horticulture (MIDH) scheme hnuaia Special Intervention leh Area Expansion Scheme-ah ram hectare 550-a zauah sapthei chin thar a nih thu leh, anthurium tam zawk thar thei turin hmalak mek a nih thu nimin khan Assembly House a hrilh.

C Lalsawivunga hian ZPM MLA pathum - V Malsawmtluanga, Lt Col. Clement Lalhmingthanga leh T Lalhlimpuia te zawhna inṭâwm chhangin, Horticulture department-in sapthei chìn pun lamah nasa taka hma a lak thu a sawi a; kum 2025 chhungin ram hectare 550-a zauah sapthei chin thar a ni a, chu'ngte chu Aizawl district-ah hectare 34, Khawzawl district-ah hectare 316, Champhai district-ah hectare 150 leh Serchhip district-ah hectare 50 a nih thu a tarlang.

Sawhthing chungchanga zawh belhna chhangin Minister chuan, kumin aṭangin Horticulture department-in leilung tichhe lo thei ang ber leh a hmun ngaia hun rei zawk sawhthing chìn theih dan zirchianna district tinah kalpui a tum thu a sawi a, "District tinah hmalakna kalpui a ni a, DHO tinah inelna kalpui a ni, a ti ṭha ber thlan a ni ang a, lawmman awmze nei tham pek tum a ni," a ti.

Horticulture Minister sawi danin, leilung tichhe lo thei ang bera sawhthing chìn dan tur zirchiannaah hian, tlang ram âwihtlânah chuanchung sang lamah chàngkham technology hman a ni dawn a, chuanhnuai âwih dam chinah terrace cultivation tih tum niin, phai chinah lei rih pàwna chin tum a nih bakah, thlai dang nena chìn chhâwk leh chìn pawlh dan zir chian a ni ang.

Sawhthing, aieng leh Mizo hmarchaah Horticulture department-in nasa taka hma a lak thu sawiin C Lalsawivunga chuan, "Sawhthing tihrona khawl Mizo pa kutchhuak, Tapchhak technology leh Rapchung technology hmanga Lalpiangliana, Sailo Machineries leh HV Lalzuimawia, Lalzui Research Foundation te siam enchhin a ni a, kan mithiamte'n phai lama an siam aiin a ṭha zawk niin an ngai," a ti a; sawhthing zai lêp nan Tapchhak technology khawl 60 sorkarin a lei tawh thu leh sawhthing pho rona atan Rapchung technology khawl lei tura an inbuatsaih mek thu a sawi.

Horticulture Minister chuan, Champhai leh Hnahlana grape chìnte chu a upat tawh avangin tinulât thar a ngaih thu sawiin, "Special Intervention Scheme hnuaiah rejuvenation kalpui a ni a, Champhai district-a grape chingtu chhungkaw 360 hnenah Intervention Scheme hnuaiah rejuvenation kalpui a ni," a ti.

C Lalsawivunga chuan, Ṭhiakah Centre of Excellence for Floriculture din turin detailed project report (DPR) buaipui mek a nih thu leh, chuta tan chuan Ministry of Agriculture and Farmers Welfare aṭangin cheng vbc 35 vel hmuh beisei a nih thu a sawi a, Serchhip ramah Centre of Excellence for Vegetables din turin DPR buaipui mek a nih thu a sawi bawk.