Eirawngbawlna gas man tihsan a ni
Indian Oil Corporation Limited (IOC) chuan eirawngbawlna gas (LPG) man a tisang a; India ram pumah March 7, Inrinni khan hman ṭan nghal a ni. Gas man tihsan chung-changah Food, Civil Sup-plies & Consumer Affairs (FCSCA) department chuan hriattirna a chhuah.
FCSCA Secretary chuan, IOC, Silchar Indane Divisional Office hnuaia Divisional LPG Sales Head aṭangin Mizoram sorkarin lehkha a dawn thu a tarlang a, "Tunlai khawvel hmun hrang hranga geo-politics boruak avanga India ram chhunga LPG lak luh man a to chhoh thu leh IOC-in LPG rate a ennawn thu kan dawng a, March 7, 2026 aṭangin domestic LPG cylinder (14.2 kg) man chu India ram hmun dang angin Mizoramah pawh bûr khatah Rs 60-in tihsan a ni," a ti.
FCSCA hotute hnen aṭanga thu dawn danin, eirawngbawlna gas (domestic kg 14.2) chu bûr khatah Rs 60-in a pung a; Vairengteah Rs 1,056 a ni tawh a, Vairengte tih loh Mizoram hmun dang zawngah Rs 1,065 a ni. Gas man tarlan aṭang hian gas lakna hmun (home delivery, point delivery, etc) azirin pawisa chawi belh ngai a la awm.
Commercial cylinder (kg 19) chu Rs 115-in a pung a, Vairengteah Rs 2,318.50 leh hmun dang zawngah Rs 2,333.50 a ni tawh. Heng bakah hian, gas bur dang mante ram pumah tihpun a ni bawk.
Hetih lai hian, Aizawla gas distributor/agency ṭhenkhat chuan India-in gas a lak luhnaah harsatna a tawh avang hian eirawngbawlna gas home delivery tura book theih hun tihdanglam a niih thu an tarlang. Gas lak hnuhnun ber aṭanga ni 21-25 a ral hma chuan gas a book theih tawh rih loh nia thu dawn a ni.