VP hoin MZU Convocation hman a ni; MZU-in mi 6,385 hnenah degree a hlan
Mizoram University (MZU) chuan March 7, Inrinni khan MZU Multipurpose Hall-ah Convocation vawi 20-na an hmang a, vice president CP Radhakrishnan bakah, Governor Gen. Vijay Kumar Singh leh chief minister Lalduhoma ten an hmanpui. Convocation-ah hian mi 6,385 hnenah degree hlan a ni.
MZU Convocation-ah hian gold medal leh book prize winner lawmman sem a ni a, Vice President, Governor leh Chief Minister ten an hlan. MZU hnuaia zirlai 6,385 hnenah degree hlan niin, chu'ng zinga mi 1,113-te chuan convocation-ah hian degree an dawng.
CP Radhakrishnan chuan, MZU chu India hmarchhaka zirna-in ṭha leh hmunhma nei ṭha berte zinga mi a nih thu sawiin, zirlai hlawhtlingte thinlung taka a lawmpui thu a sawi a, "Degree hi zir zawh entirna certificate mai ni lo, hma thar lakna tur entirna a ni a, convocation hi hlimna hun leh kal zelna tura mawhphurhna thar lakna hun a ni," a ti.
India rama remna thuthlung ziah hlawhtling berte zinga mi Mizoram Peace Accord 1986 chuan inrem lohnate dawhkana chinfel theih a nihzia a lantir thu sawiin Vice President chuan, "Zirna ṭhan zel nan muanna a pawimawh a, hmasawn nan ram ralmuang nih a ṭul. Act East Policy-in hmarchhak state-ah danglamna nasa tak a thlen a, Asia chhimchhak ramte luhka pawimawh tak a nihtir," a ti a; Prime Minister kaihhruaina hnuaiah hmarchhak chu India rama hmasawnna bung pawimawh a nih thu a sawi.
CP Radhakrishnan chuan, "Bairabi-Sairang rel kawng hawn tâk hian zalenna kan hmuh aṭanga kum 78 hnuah Indian railway map-ah Aizawl a chuantir a, mellung pawimawh tak a ni. Zalenna hmuh champha kum 100-na (2047)-ah India hi ram intodelh leh hmasawn 'Viksit Bharat' a siam tumin sorkarin theihtawp a chhuah a, hei hi kan zavaia ṭanrualna tur a ni a, ṭhalaite'n mawhphurhna lian tak an nei," a ti.
Governor Gen. VK Singh, MZU chief rector ni bawk chuan, convocation chu kum eng emaw chen inthununna, beih hram hramna leh tumruhna a taka a lan chhuahna hun leh hmasawn zel tura bul ṭanna thar a nih thu a sawi a, "MZU hi tunah chuan hmarchhak state-a zirna sang ngaihhlut leh ṭhang duang berte zinga mi a ni," a ti a; thiamna leh finnate mi dang rawngbawlna atan hmang tur leh tlawmngaihna nunpui tlat turin zirlaite a chah.
CM Lalduhoma pawhin thu sawiin, zirna tihmasawn tura Mizoram sorkar hmalaknate a tarlang a, "Kumin aṭangin Mizoram Engineering College-ah class ṭan tum a ni a, Mizoram State University din turin hmalak mel a ni. Mizoram sorkar flagship scheme Handholding hi ṭhalai, mahni kea ding tura theihna leh thiamna neite tana buatsaih a ni a, hmang ṭangkai turin ṭhalaite ka sawm a ni, " a ti.
MZU chu university naupang tê a ni chunga NIFR 2025 ranking-ah India rama university ṭha 82-na a ni pha chu chhuanawm a tih thu sawiin Lalduhoma chuan, thawktute a lawm thu a sawi a, an kal zelna turah duhsakna a hlan.
MZU convocation-ah hian MZU vice chancellor Prof. Dibakar Chandra Deka chuan kal khawmte lawmna thu a sawi a ni.
Mizoram University hi kum 2001-ah din a ni a, department 39 a awm mek. Centre pahnihin school of study 10-ah under graduate, post graduate leh Ph.D programme an kalpui mek a; affiliated college 40 leh constituent college pakhat a nei mek bawk.
MZU CONVOCATION VAWI 20-NAA DEGREE/LAWMMAN DAWNG ZAT
Doctor of philosophy - 147
Master of philosophy - 3
Master's degree - 486
Master's professional - 137
Bachelor's degree - 121
Bachelor's professional - 174
Gold medalist - 43
Book Prize winner - 2