NFSA-ah mi 7,13,346 an awm

National Food Security Act (NFSA), 2013 hnuaiah Mizoramah ration card 1,81,592 a awm a, chutah chuan hamṭhatna dawngtu mi 7,13,346 an awm mek.

Food, Civil Supplies & Consumer Affairs minister (FCSCA) B Lalchhanzova chuan Assembly session neih mekah Lawngtlai West bialtu MLA C Ngunlianchunga zawhna ziaka chhangin, sorkar laipuiin NFSA, 2013 a hman aṭang khan Public Distribution System (PDS) hnuaia hamṭhatna dawngtute chu BPL tia thliar an nih tawh loh thu a tarlang a; NFSA hnuaia hamṭhatna dawngtute hi Antyodaya Anna Yojana (AAY) leh Priority Households (PHH)-ah ṭhen niin, AAY hi ration card eng hmangtute an ni a, PHH hi ration card pawl hmangtute an ni.

Supply Minister tarlan danin, February, 2026 dinhmun angin Mizoramah AAY card 25,005 a awm a, card eng hmangtu (beneficiaries) mi 61,382 an awm mek. PHH card 1,56,587 awm mekin, hemi hnuaiah hian beneficiaries 6,51,964 an awm mek bawk.