Rélin Sairangah buhfai a phur thleng

Food Corporation of India (FCI)-in Mizoram tana buhfai a rawn thawn luh eng emaw zat chu nimin khan zing dar 3:45 khan Sairang rél chawlhhmunah rélin a rawn phur thleng a, rélin Sairang station-a buhfai a phurh thlen hmasak ber a ni.

Sairang chawlh­hmuna buhfai thleng hi quintal 25,901 niin, rêl wagon 42-in a phur a; Food, Civil Supplies & Consumer Affairs (FCSCA) minister B Lalchhanzova, Rajya Sabha MP K Vanlalvena, State Consultative Committee of FCI chairman ni bawk leh, FCI leh sorkar hotute'n nimin zing khan an tlawh nghal.

B Lalchhanzova chuan, rél hmanga Sairang station-a buhfai phurh thlen a ni ta chu Mizoram tan chhin­chhiah tlak a nih thu a sawi a, "Fûrpui lo thleng turah pawh a thlamuanthlak dawn hle. Mizoramin thla khata buhfai kan mamawh zat hi quintal 97,000 a ni a, FCI aṭangin qtl 55,000 kan dawng a, qtl 41,000 hi a thlawna kan dawn a ni. A bak zawng hi Open Market Sale Scheme (Domestic) aṭanga 830/quintal-a lei a ni a, buhfai quality ṭha zawk lei tuma hmalak mek a ni," a ti.

FCSCA Minister sawi danin, Aizawl, Lunglei leh Lawngtlaia FCI kudama dah tur buhfaite chu Sairang station-ah a thlen tawh dawn a, Mizoram hmar lam kudama dah tur buhfaite chu Bairabi station-ah a thleng thung ang.

Sairang station-a buhfai thleng tur chungchangah Sairang Dinthar khawtlang hruaitute leh YMA-te nen an ṭhutkhawm tawh thu sawiin B Lalchhanzova chuan, "Buhfai hi Pathianniah te, zing leh zanah te pawh a lo thlen hun a awm dawn. Rêl station aṭanga Sairang Dinthar FCI kudama motor lianin a thiar a ngai dawn a, Sairang khawtlang nun pawh a tihbuaina chen a awm dawn a ni," a ti a; hei vang hian Sairang mipuite dawhtheihna leh hriatthiamna a ngen.

Sairang chawlhhmuna buhfai phur rél wagon thleng hmasa ber pual hian inkhawm tawi buatsaih a ni a; FCSCA Minister leh Rajya Sabha MP bakah, FCI Divisional Office divisional manager Bankim Phonglo, FCSCA secretary Teresy Vanlalhruaii leh mi pawimawh dangte an tel a ni.