2025-26 Supplementary Demand pawm; 'Loan ṭha chi pûk zel kan tum' - CM

Nimin khan Assembly session-ah kum 2026-27 budget sawiho a ni a; sorkar kum hmasa 2025-26 chhunga sum indaih lohna phuhrûkna Supplementary Demand for Grants 2025-26 cheng vbc 3,710.38 pawm a ni. Finance changtu chief minister Lalduhoma chuan, loan ṭha chi pûk zel an tum thu a sawi.

Chief Minister chuan, eptu lamin sorkar hnathawk enkawlna leh inrêlbàwlna, Revenue Expenditure a san thu an sawi nasa tih sawiin, "Revenue receipt rau rauah chuan kan hmuh tur aia kan hman tur tlemna cheng vbc 889.84 a tling a, revenue surplus a ni. Mizoram awm hnuah revenue surplus a awm vawi hnihna a ni a, a awm hmasak chuan revenue surplus hi cheng nuai 27 a ni," a ti.

Internal debt-ah an âwl thu sawiin Lalduhoma chuan, "Cheng vbc 24.99-in kan titlem dawn. Thil lawmawm tak a ni a, GPF kan pek ṭhat vangte pawh a ni ang. Leiba ṭha lo, open market borrowing (OMB) lam tihtlem zel kan tum. Leiba ṭha chi, a pung awm lo, Central-in 90% a rulh tur leh a pung tlem chite chu pûk zel kan tum," a ti a; OMB chu an sorkar chhungin kum tin a tlakhniam ziah thu a sawi.

Capital Expenditure a tlem nia eptu lamin an sawi chungchangah CM Lalduhoma chuan, "Cheng vbc 224.45-in Capital Expenditure a pung dawn. In ti ṭha lo in ti a nih pawhin, Pu Modi-a ten ti ṭha min ti a, tih ṭhat lawmman min pe. Kan ti chhia nge ti ṭha chu Central sorkarin an hre chiang ber a, tih ṭhat lawmman hmu phak zingah kan tel," a ti.

Chief Minister chuan, sorkar hnathawk hlawh kum tin a pun zel avangin Revenue Expenditure a san loh theih loh thu sawiin, "Kum tin increment an hmu a, an DA leh DR a pung zel. Kan sorkar hnuaah post fill-up 11,156 kan phalsak, department tinah indaih lohna kan rochun avangin. Sorkar hnathawk indaih lohna a ziaawm deuh," a ti a; post ruak hnawhkhah vak vak reng a nih chuan an tlin dawn loh avangin an fîr tawh dawn thu a sawi bawk.