District tihhmasawnna tur sum sem a ni

Chief minister Lalduhoma chuan nimin khan Planning Committee Room-ah district tinin an district ṭheuh tihhmasawnna tura ruahmanna an siamte tihhlawhtlinna tur sum, District Catalytic Intervention Plan Fund a sem a; district tin hnenah cheng nuai 100 ṭheuh pek a ni.

CM Lalduhoma chuan, tun hmain District Planning Committee din a nih tawh ṭhin thu leh meeting pawh neih ṭhin a nih thu sawiin, "An district plan-te a taka an kalpuina tur fund pek an ni ngai lo a, an ruahmannate a takin an kalpui thei ṭhin lo. Kan sorkar hian district-te'n hma an sawnna tura anmahni ngeiin plan an neih leh chumi tihlawhtling tura sum leh pai pek ngei theih hi kan duh a, vawiinah a bul kan ṭan ta," a ti a; Bána Kaih tihhlawhtlinna pakhat a nih thu a sawi.

District plan-ah DC-te chu thuneihna sang tak pek an nih thu sawiin Lalduhoma chuan, "Project proposal pawh DC-te bultuma siam a ni. He fund a hlawhtlin theih nan DC-te'n mawhphruhna pawimawh tak an chelh. A bul kan ṭan ang a, kan hman ṭhat viau chuan a dang pawh la pek chhuah zel theih tura duan a ni a, hna a chhe tur a ni lo," a ti.

Fund hi Handholding scheme component 5-na 'Decentralised Plan' hnuaia pek a ni a, pawisa an dawn aṭanga 10% chu inrêlbâwlna (administration fund) atana hman theih a ni. Chief Minister hian DC tin hnenah cheque-in sum a hlan a; hna an thawh ṭhat dan azirin pek belh zel tura tih a ni.

Sum pek chhuahna inkhawm hi Planning secretary Lalmalsawma Pachuau-in a kaihruai a, Catalytic Plan kalpui dan tur tlangpui a tarlan a ni. Finance commissioner Vanlaldina Fanai leh DC-te aiawhin Aizawl bawrhsap Lalhriatpuia ten thu an sawi bawk.