KṬP-in ruihhlo donaah hmalak zel an rêl

February 26, 2026 aṭanga Saituala neih KṬP General Conference vawi 61-na chu nizan khan a ṭiak. Inkhawmpui hian ruihhlo donaah hmalak chhunzawm zel a rel.

KṬP General Conference-ah hian February 28, Inrinni khan Saitual Kohhran biak-inah rorel palaite'n ro an rel a, Central KṬP leader Rev. H Lalawmpuia'n a kaihruai. Ruihhlo donaa hmalakna chhunzawm zel rawtna eng emaw zat a lut a, pawm a ni.

Kum 2027 KṬP kumpuan thupui atan Electric Veng Bial aṭanga lut, 'Ṭhalai leh liberal ideology' tih an thlang a, kum 2026-27 KṬP budget atan cheng nuai 93.5 an pawm. Kum 2030-a General Conference thleng turin Zawlnuam an thlang a, Zawlnuam Bial leh Bawrai Bial ten an thleng ang.

Kum 2028 General Conference thlengtu atan Mamit thlan a lo ni tawh a, mahse, Mamit hi an phat leh avangin Champhaiah nghah a ni ang.

Kumina KṬP General Conference-ah hian February 28, Inrinni zan dar 10 thleng khan mikhual 42,982 leh palaite lirthei lut 8,308 chhinchhiah a ni a; nimin khan lehlángin mi ṭhahnem tak an kal bawk. Nimin chawhmaa inkhawm zat an chhiar chin chu 59,000 vel a ni.

KṬP General Conference-ah CKṬP hruaitu turte thlan ṭhin ni mah se, kumin aṭangin thlan a ni tawh dawn lo. Mizoram Synod ruahman angin, Aizawla pastor bial 49 chu hlawm thumah ṭhenin, hlawm hniha pastor bial aṭangin CKṬP hruaitu tur an ruat ṭhin dawn. Bial aiawha CKṬP hruaitu tur chu Bial KṬP-in an thlang a, Bial KṬP-in an thlante chu nizan inkhawmah puan chhuaha hlan an ni. Synod chuan kum 2026-2028 chhunga leader atan Rev. Dr KM Vanlalpeka a ruat a ni.