Dik lo taka thil tite kan dîm dawn lo - Revenue Minister

Land Revenue & Settlement minister B Lalchhanzova chuan nimin khan LRS department-in surveyor 14 a lak tharte LRS Directorate-ah a kâwm a; LRS department chuan inthen fai hna an thawk mek a, dik lo taka thil tite man chhuah an nih chuan an dîm dawn lo tih a sawi.

Revenue Minister chuan, LRS department chu department ṭawp, eirukna leh hlemhlêtna tamna leh a thawktute pawh dawr harsa tak anga hriat a ni ṭhin thu a sawi a, "Hei hi thlak tumin hotu lian ber aṭanga district office zawng zawngah ṭan lain kan insiamṭha mek a, mipuiin min thlir dan tam zawk chu mipui nena indawr hnai ber surveyor-te kutah a awm. Department-in inthen fai hna kan thawh mekah dik lo taka thil tite lakah finfiahna ṭha tawk tak a awm chuan kan dîm dawn lo a, complaint dan tur dik taka complaint awmte chu kan bawhzui zel," a ti.

Mi chan ai chuh te, zangna-dawmna lâkna tura rinawm lo taka thil tih te, ram tehnaa lo tlak zeh ve te, sorkara ram surrender tur ram tehnaa a neitute insiam rempuia report dik lo pekte leh eirukna lam rawng kai reng renga inhnamhnawih lo turin LRS Minister chuan surveyor tharte a chah a; an nun uluk tur leh ruihhlo lakah invawng tlat turin a fuih bawk.

B Lalchhanzova chuan, surveyor indaih lohna hriaa Chief Minister-in surveyor thar 14 lakna tur a phalsak leh, tunah hian surveyor dang 30 lakna tur exam zawh a nih leh tawh thu a sawi bawk a ni.