Kum 2025-ah KṬP member 569 an thi

Kum 2025 chhung khan Kristian Ṭhalai Pawl (KṬP) member 1,81,141 an awm a, KṬP member 569 an thi.

KṬP General Conference vawi 61-na Saituala neih mekah nimin khan report inkhawm neih a ni a, report hrang hrang ngaihthlak a ni. Report-a a lan danin, kum 2025 khan KṬP member 1,81,141 awmin, mipa 1,09,456 leh hmeichhia 71,675 an ni.

Kum 2025 chhung khan KṬP member 569 an thi a, mipa 502 leh hmeichhia 67 an ni a; mipa thi zat hi thi zawng zawng aṭangin 88.2% a tling. KṬP member thi zat hi kum 2024 khan 615 a ni a, kum 2023 khan 552 a ni.

Tun dinhmunah KṬP branch branch 917 awmin, chungte chu Mizoram chhungah 865 leh state pawnah 52 a ni a; member tamna ber branch - Mission Veng Branch-ah member 1,447 an awm. Bial KṬP (pastor bial) 218 a awm a, chungte chu Mizoram chhungah 207 leh state páwnah 11 a ni a; member tamna ber bial Champhai Vengthlang Bialah member 1,576 an awm.

Saitual aṭanga thu dawn danin, nimin tlai dar 5 thleng khan inkhawmpui palai 21,747 an thleng tawh. Vawiin hian Saitual Kohhran biak-inah rorel palaite'n ro an rel ang a, rorel hlanin palai náwlpui tan pandal-ah inkhawm a awm ang.