Mahni intihlum an tlem theih nan MṬKP-in inzirtirna neih an rêl

Mizoram Ṭhalai Kristian Pawl (MṬKP) rorel vawi 72-na February 26, Ningania neih chuan mahni intihlum an tlem theih nan inzirtirna neih an rêl.

MṬKP rorel hi Lawngtlai Electric Veng BCM biak-inah neih a ni a, MṬKP president Upa R Lalbiakzuala'n a kaihruai a, rorel palai 633 an tel. Mahni intihlum an tlem theihna tura inzirtirna neih an rêl a; ṬKP platinum jubilee pualin Christian Hospital, Serkawna dah tur ventilator khawl pakhat lei ni se, an ti. MṬKP hmalakna kal mek, 'Thlarau bo man beihpui thlak' chu kum 2026-27 chhungin chhunzawm an rêl a, kum 2026 budget atan Rs 18,00,000 an pawm.

Rorel inkhawma tarlan danin, kum 2025 rorel leh 2026 rorel inkarah ṬKP member 166 an thi a, mipa 139 leh hmeichhia 27 an ni. Innei tuak 602 an awm a, kohhran dân puitlinga innei tuak 400 leh dân têa innei tuak 202 an ni. Kum 2025-26 chhungin MṬKP-in Rs 81,58,731 a hmu a, Rs 71,49,293 hman a ni.