Sialkal Range Development Council Bill Select Committee zir chian tura dah a ni

Nimina Assembly session-ah chief minister Lalduhoma put luh, 'Sialkal Range Development Council (SRDC) Bill, 2026' chu sawiho a nih hnuah, Mizoram Legislative Assembly hnuaia Select Committee zir chian tura dah a ni.

Bill pu luttu Chief Minister chuan, SRDC Bill chuan khaw paruk - Saitual district-ah khaw pali leh Champhai district-ah khaw pahnih a huam thu a sawi a, "MLA bial pahnih ve ve a huam. Kum 2012 khan Congress sorkarin bul tumin, Sialkal Tlangdung Development Board tih a ni. A lokal zel a, kum 2013-ah Sialkal Range Development Council tih a ni a, khaw paruka VC-te member-ah an awm nghal a, chairman chu Lengteng Bialtu MLA a ni. Tuna bill chu dan pangngai angin kalpui tawh ni se tihna a ni ber," a ti.

CM Lalduhoma chuan, Bill chu fimkhur ngai tak a nih thu sawiin, "Civil society a nghawng a, member-te pawhin Central YMA aṭangin lehkhate kan dawng hlawm. Lungrual taka kalpui a ṭhain ka hria. A eng zawng pawhin kalpui ila, pass theih pawhin lungrual takin pass ila. Thil sensitive tak, ṭhangthar lo awm zel turte pawhin min dem emaw fak tur kan ni. Inhnial vak vak lam tum loin, thutlukna nei thei ila a ṭha berin ka hria," a ti a; Speaker hnenah Leader of Opposition ngaihdan lak a dil.

Opposition leader Lalchhandama Ralte chuan, Bill an hmu a, Cabinet-in uluk taka a ngaihtuah tawh, Bill pu luttuin a wihdraw si loh avangin, rorel tura kal khawm an nih angin sawiho chu an tih tura a ngaih thu a sawi.

Member-te'n an sawiho hnuah Parliamentary Affairs minister Vanlalhlana leh CM Lalduhoma te chuan Select Committee zir chian tura dah an rawt a, eptu member-te pawhin an remti. Bill hi Select Committee-in an zir chiang ang a, rawtna an siam dawn a ni.

Tarlan danin, SRDC Bill-in a tum ber chu, SRDC-ah inthlanna buatsaih a, Sinlung Hills Council ang deuha mumal zawka kaltir a ni. Bill-a tarlan dan chuan, member paruk thlan tur a ni a, chief executive member, chairman leh executive member an awm dawn a, secretary atan BDO a ni ang.

SRDC Bill pawm a nih tak loh avangin SRDC chu a pangngaiin by notification-in a kal chhunzawm leh rih dawn a ni.