Chi bila hma la lo turin ngen

Central YMA chuan thuchhuah siamin, Mizorama chengte chu chi bil zawnga hma la lo turin an ngen.

CYMA hian YMA Inkhawmpui Lian vawi 75-na, October 21-23, 2025 chhunga Sarkawrdaia rorelah, "Zo hnahthlak chi pêng hrang hrang Mizorama chengte zingah, chi bil hmalakna a awm tawh loh nan CYMA-in hma la rawh se," tih bawhzuina atan thuchhuah an siam a ni.

Mizoram chu Zo fate inlungrual tak leh inrem taka kan chenhona a nih thu tarlangin CYMA chuan, "Kan hnam inlungrualna tichhe thei chi bil zawnga hmalakna, chi bil hamṭhatna tur leh dâwmkânna tur zawnga hmalak bikna hrang hrangte ti lo turin sorkar, kohhran leh pawl hrang hrang kan ngen a ni," an ti.

Central YMA chuan, Mizote chu hnam tlem an nih avangin hnam pual bila thil tih hrang hrangte'n Mizo hnam inpumkhatna a tichhe thei tih hria a, hnam pumpui ṭhatna tura ngaihtuahna seng turin Mizorama chengte an ngen a ni.