Joint YMA Field-a phûllem phah tur Sports Minister hoin sawiho a ni

Sports & Youth Services minister Lalnghinglova Hmar chuan February 21, Inrinni khan a bial Aizawl West-II chhunga Joint YMA Field-a phûllem (artificial football turf) phah tur a hmunah a tlawh a, sorkar official leh khawtlang hruaitute nen hmalak dan tur an sawiho.

Lalnghinglova Hmar chuan, Aizawl West Joint YMA-te'n an khelmuala phûllem phah an dil thu leh an dil laia pawisa a awm loh avanga tihsak nghal theih an nih loh thu a sawi a, "Tunah sorkarin hnathawhna tur sum a pek aṭanga phah theih tur a ni hi a lawmawm," a ti a; sum awm dan azirin thil dang telh theih tur tichiang turin khawtlang hruaitu leh Joint YMA nen sawiho a duh avanga a hmuna tlawh a nih thu a sawi.

Joint YMA Field-a hna thawhna atan SASCI aṭangin cheng vbc 10 hmuh a ni a; hmalakna tur sawiho zingah field-a tui lut lo tura a venna siam te, tui paihna (drainage) mumal tak siamna tur zir chian a, a hmunhma mil anga hmalak te, gallery ṭha tak siam te, zana training neih theihna tur tâwka êng (light) vuahte a tel a ni.

Lalnghinglova Hmar hian Inrinni vek khan a bial chhunga Vaivakawn Zohnuai - Rangvamual inkal pawhna tur kawng km 1.4 vela thui siam tur a en. Kkawng siamna atan SASCI hnuaiah cheng vbc 5.7 ruahman a ni. Minister hi Aizawl West-I bialtu MLA TBC Lalvenchhunga'n a ṭawiawm a ni.