Damdawi zawrhna dawr neitu pahnih CADS-in Excise dept hnenah an hlan

Central YMA hnuaia ruihhlo dotu Central Anti Drugs Squad (CADS) chuan tun hnai khan damdawi zawrhna dawr neitu pahnih chu dan phal loha damdawi an zawrh avangin Excise & Narcotics department hnenah an hlan.

CADS hruaitute aṭanga Vanglaini thu dawn danin, tun hnai khan Crystal Clear Pharmacy, Chanmari, Aizawl neitute'n dan loa Babutlang, Zarkawta Alprazolam (AP) báwm hnih 132g an pe tur chu CADS duty-te'n an nangching a; zanah Aremi Pharmacy, Chhinga Veng pawh an damdawi dawra khuh damdawi, an lakna 'Purchase Invoice' nei loa an kawl leh, phalna nei lo hnena damdawi an pek chhuah an man bawk.

Damdawi dawr pahnih neitute hian dan loa damdawi an pek chhuah leh an kawl fo avangin Excise & Narcotics department-te kutah hlan an ni.

CADS chuan, damdawi ruih theih, a mamawh tak hnen pawh ni lo, ruihhlo a fihlim lo leh dan phal loha a hlawma pe chhuak ṭhinte vanga ṭhalaite'n ruihhlo ngawl an vei chho zel chu pawi an tih thu an tarlang a, "He thil hi ṭhalaite hma hun tichhetu a nih avangin tun hma aia nasa leh zual zawka hmalak kan tum," an ti a; damdawi dawr neitute pawh hetiang thil ṭha lo laka fihlim tur leh dan leh hrai zawm tlat turin an ngen a ni

Ṭhalaite zingah damdawi ruih theih, in chi leh hmawm chi ngawlvei an tam avangin ngawrh lehzuala ruihhlo do a ṭul thu tarlangin CADS chuan, "Damna atana mamawhtu tak pawh ni lo, ruihhlo atana hmang ṭhinte hnena damdawi a hlawma hralh chhuak ṭhinte umzui hna hi nasa zawkin kan thawk a ni," an ti.