Bawlhhlawh paihna hmun ṭha leh dik kan la neih loh chhan sawifiah a ni

UDPA minister K Sapdanga chuan tun thlenga bawlhhlawh paihna hmun ṭha leh dik, duh ang kan la neih loh chhan February 19, Ningania Assembly Session-ah House a hrilh a, bawlhhlawh paihna ṭha nei tura an hmalaknate a tarlang nghal.

ZPM member pathum - VL Zaithanzama, Lt Col Clement Lalhmingthanga leh Jeje Lalpekhluate zawhna inṭawm chhangin UDPA Minister chuan, "Tlangram kan nih avangin bawlhhlawh sawngbawlna tur hmun zawl leh rualrem ṭha a vang. A awm chhun pawh vantlang ram ruak emaw, sorkar ram te anih ṭhin loh avangin bawlhhlawh paihna atan hman a remchang ṭhin lo," a ti.

UDPA Minister chuan sum harsatna avang pawhin bawlhhlawh sawngbawlna hmun ṭha leh dik neih a harsat thu sawiin, "Bawlhhlawh sawngbawl chungchang hi khawvel hmasawn zel mila danglam ve reng a ni," a ti a, tuna dan hman mek 'Solid Waste Management Rules, 2016' pawh hi kum 2016 ah chhuah niin, tunah chuan SWM Rules, 2026 a chhuah leh tawh thu a sawi.

K Sapdanga chuan Tuirial hmuna bawlh-hlawh sawngbawlna hman mek pawh hi siam a nih lai khan a hunlai mila changkang leh ṭha anga ngaih nimah se, tun dinhmunah chuan a aia ṭha zawk leh changkang zawka tih changtlun a ngai tawh hlea a lan thu sawiin, "Tuirialah hian bawlhhlawh ṭawihthei sawngbawlna changtlung tak, ni khata metric ton 50 sawngbawl thei awmin, hman mek a ni," a ti.

Damdawi-in leh clinic bawlhhlawh (bio-medical waste) bik sawngbawlna changtlung tak neih tawh a nih thu sawiin UDPA Minister chuan, "Hetiang bawlhhlawh hi nitin kg 1,400 vel sawngbawl ṭhin a ni," a ti a, damdawi-in leh clinic bawlhhlawh sawngbawlna bik hi Lungleiah siam leh tur niin, hun rei loteah bulṭan theih an inbeisei thu a sawi.

UDPA Minister chuan Aizawlah Construction & Demolition Waste Treatment Centre sak mek a nih thu sawiin, "Bawlhhlawh ṭawihthei lo sawngbawlna tur ṭha leh changkang tak ni khata metric ton 75 sawngbawl thei IGC, Luangmualah siam mek niin, July 2026 aṭanga hman ṭan tum a ni. District khawpui leh urban town-ah pawh Solid Waste Management Centre din vek kan tum," a ti.

K Sapdanga tarlan danin, Aizawl bawlhhlawh khawnna leh paihna atan kum 2024 - 2025 ah cheng vbc 8.40 leh 2025 - 2026 (January 30, 2026 thleng) ah cheng vbc 7.35 hman a ni.