Bana Kaih Scheme hnuaia loan pung rulhsak; CM Special Package hmang ṭha thlang dawn

Mizoram sorkar flagship programme ‘Bana Kaih Scheme’ kaltlanga loan la tura thlan progress partner-te zinga loan rùl ṭhate hnenah February 16, Thawhṭanni khan Mizoram sorkar chuan an loan punna (interest) rulhsakna tur Rs 15,92,138 chu loan pe chhuaktu bank-te hnenah a hlan a; CM Special Package dawngtu zingah hma la ṭha thlan chhuah a, lawmman pek an ni dawn.

Adviser to CM (Implemen-tation of Handholding Policy) Dr KC Lalmalsawmzauva hoin February 16, Thawhṭanni khan IPR Lianchhiari Rûn mini theatre-ah Chief Minister’s Special Package semna leh Bana Kaih Scheme hnuaia loan late zinga loan rul ṭhate loan interest pek letna hun hman a ni a; Bana Kaih Scheme hnuaiah hian sorkar chu loan latute zinga loan rul ṭhate loan interest thla ruk dana pelet tura tih niin, thla ruk dana a punna hmasa ber Rs 15,92,138 chu Thawhṭanni khan progress partner-te bank account-a thun turin loan pechhuaktu bank-te hnenah hlan a ni.

Dr KC Lalmalsawmzauva chuan, Bana Kaih Scheme chu Mizoram tihmasawn tura thiamna leh theihna nei, mi taima leh hlawhtlin tum tlatte zawn chhuah a, eizawnna ngelnghet an neih theihna tura ṭanpuina tura duan a nih thu a sawi a, "Hlawhtlin ngei tumte chauh thlan chhuah an nih theih nan sorkar department hrang hranga thawktute pawhin dilna lutte thlitfim leh vil zui hna uluk takin an kalpui ṭhin a, Bana Kaih Scheme hnuaia progress partner ni tura thlan chhuah zingah loan rûl ṭha lo an awm hriat a ni lo," a ti.

Progress partner-te'n a hun taka loan an hmuh theih nana bank-a thawktute inpekna chu fakawm a tih thu sawiin Dr KC-a chuan, mipui nena indawrtawnna hmun pawimawh tak a nih angin bank-a thawktute chu dawr nuam, hmel hmuh nuam leh dawhtheihna nen mipuite chhàwn chhunzawm zel turin a fuih.

Inkhawm hi Planning principal adviser Dr Lalrinchhana'n a kaihruai a; Bana Kaih Scheme kalpuitu sorkar department leh agency 21-a nodal officer leh assistant nodal officer-te, Bana Kaih Scheme thawhpuitu Mizoram Rural Bank, State Bank of India, Mizoram Cooperative Apex Bank, IDBI leh UBI Bank-a thawktute an tel a ni.

BANA KAIH SCHEME

▶ February 10, 2026 thleng khan chhungkaw 384 hnenah loan pek a ni tawh a, loan pek tawh hi Rs 34,0389,928 a tling tawh.

▶ Bana Kaih Scheme Phase-II hnuaiah loan hmu tur chhungkaw 147 thlan a ni tawh.

▶ CM Special Package hnuaia progress partner atana thlan mi 2,713 hnenah Rs 22,62,51,870 pek a ni.

▶ Phase–II hnuaiah chhungkaw 458 hnena pek tur Rs 2,28,93,500 chu Feb. 16, 2026 khan tihchhuah a ni.

▶ Phase–II kalpui leh hnu hian progress partner 917 thlan an ni tawh.