MP-in chhim lama kawngpui pahnih National highway-a puang turin ngen

Parliament session neih mekah nimin khan Rajya Sabha MP K Vanlalvena chuan Mizoram chhim lama kawngpui ṭhenkhatte national highway-a puang turin sorkar laipui a ngen.

MP K Vanlalvena hian nimin khan zero hour-ah thu a sawi a; Hnahthial aṭanga Myanmar ramri kawng Hnahthial - Tarpho - Khawhri - Cherhlun - Thingsai - Bualpui H - Saisihchhuah kawngpui leh, Hnahthial - Tuipui D - Darzo - S Vanlaiphai - Sangau - Pangkhua - Saisihchhuah kawngpui chu national highway-a puang turin sorkar laipui a ngen a ni.

Kum 2020-ah Myanmar sorkarin Chin state khawpui Hakha aṭanga India leh Myanmar ramri Saisihchhuah thlenga double lane kawngpui an sial zawh tawh thu sawiin K Vanlalvena chuan, "India sorkara Ministry of Commerce and Industry-in Saisihchhuahah ramria insumdawn tawnna hmun tenau, border haat a puang tawh chungin kawngpuiin a la pawh lo. He kawngpui hi sial tlanga national highway-a puan a nih chuan Act Eat Policy tihhlawhtlinna atan te, ram venhimna atan leh Mizorama tribal mipuite ei leh bara hma an sawnna atante a ṭangkai dawn a ni," a ti.

Rajya Sabha MP chuan, Sairang rél chawlhhmun hawn a nih aṭangin Aizawl leh Sairang inkarah lirthei tlan a pung nasa tih sawiin, tuna kawngpui awm mek NH-54 chu a zau tâwk lo a, a rang thei ang bera thlur li (four lane)-a siam a ṭul thu a sawi bawk.