Thiamthil nei ṭha ṭhalaite chawisàn kan tum - Duhoma

Chief minister Lalduhoma chuan nimin khan IPR conference hall-ah Confederation of Indian Industry Centre for Excellence on Employment & Livelihood (CII CEL) leh Mizoram sorkar buatsaih 'Micro & Small Entrepreneurs Excellence Project in Mizoram' leh 'Mizoram Entrepreneurs Development Forum' a hawng a; thiamthil (skill) nei ṭha ṭhalaite sorkarin chawisan a tum thu a sawi.

CM Lalduhoma chuan, Mizoramin deh chhuah a neih a, hnathawh tur a pun theih nan thiamthil nei ṭhalaite chawikan an tum thu a sawi a, "Kan entrepreneur-te hi an bána kaia din chhuahtir kan duh a, kan flagship scheme Handholding hian an tan remchang a siamsak mek a ni," a ti.

Mizote chu tun hma aṭanga thiamthil ngah tak an nih thu sawiin Lalduhoma chuan, "MSME lamah hmakhaw êng tak kan nei. Nikumah khan IndiaSkills Competition-ah Mizo ṭhalai eng emaw zatte'n lawmman an dawng," a ti a; kuminah pawh Indiaskills NE Championship-ah Mizo ṭhalaite overall champion an nih thu a sawi.

Chief Minister chuan, industry lian tham lo (MSME) neitute'n thiamna an nei ṭhat thu sawiin, "Mahnia eizawnna bul lo ṭan a, ṭha taka lo kalpui tawhte an ni. Tun dinhmun aṭanga sang lehzuala an lâwn theih nan heng project hi kan buatsaih. Khawvel a changkang zel a, sumdawn dan changkang zawk a piang reng. Kan MSME-te pawh hmasawn zawnga an kal ve zel loh chuan an hnungtawlh mai ang tih kan hlau," a ti.

MSME-te kawhhmuh turin CII tluka ṭha India ramah an awm loh thu sawiin Lalduhoma chuan, "CII CEL hian state dangah pawh hetiang hmalakna an kalpui a, an hlawkpui em em. MSME neitute'n man chawia kal an inchuh hial ṭhin. Keini chu Volvo Group-in an CSR hmangin kan sensote min tumsak an remti hlauh mai," a ti a, a thlawnin MSME neitute an kal theih dawn thu a sawi.

Chief Minister-in a hawn project pahnihte hi Mizoram MSME neitu, an hnathawhna lama hmasawn zel duh, tunlai thiamna thar ber ber nena intuaihriam duhte tana buatsaih a ni a, mithiam zawkte nena an mamawh sawihona siam a ni ang. Kum khat chhung kalpui phawt tur a ni a, training turin mi mi 70 thlan an ni.