HM-in ram leh hnam tan huaisenna leh tumruhna thar nei turin zirlaite a fuih

Mizo Students' Union (MSU) chuan nimin khan Vanapa Hall-ah an din champha leh silver jubilee an lawm a; an hun hmanpuitu Home minister K Sapdanga chuan, ram leh hnam tan huaisenna leh tumruhna thar nei turin zirlaite a fuih.

K Sapdanga chuan, Mizo zingah kum 10 chhung IAS-a inziak tling leh kum 30 chhung IPS-a inziak tling an awm tawh loh thu a sawi a, "Zirlaite hian tualchhung ringawt ngaihtuah loin, UPSC hi ngaihtuah ang u. Keimahni leh kan chhungte bakah, ram leh hnam tan huaisen thar leh ila, tumruh thar leh ang u. Kan tih tak tak chuan kan tling thei a ni," a ti.

All India sevice dangah pawh Mizo tling an tlem thu sawiin Sapdanga chuan, "Kan chhehvela kan hnampui deuhte leh kan hnampui ni chiah lo, kan chenpuite all India service-ah an inziak tling a, competition hrang hrangah hma an hruai," a ti a; nakin lawkah chuan Mizoram sorkar office-a a lal berte chu hnam dang vek an nih a ngaih dawn thu a sawi.

K Sapdanga chuan, "Tunah hian IAS/IPS-ah inziak tling nei ta ila, kum 10 chuangin kan hnufual tawh. Mahse, hei hi hnual phah nan kan hmang tur a ni lo a, theihtawp chhuah phah nan leh rualawh nan i hmang ang u," a ti a; sorkar thutlukna bawhzuitu ni mai lo a, thutlukna siamtu ni thei tura inzir zel turin zirlaite a chah a ni.

MSU hi kum 2001-ah din a ni a, silver jubilee lawmna inkhawm hi vice president Roluahpuia'n a kaihruai a; MSU president B Lalkhawngaihzuala, senior adviser Prof. JV Nungchunga, MSU president hmasa ber K Laldinthara leh hruaitu hlui dangte'n thu an sawi.

HOME MINISTER THUSAWI ṬHENKHAT

■ Tun laia sorkar anga manganthlak chu - hnam dang IAS/IPS patuai a rual ruala sorkar laipuiin Mizorama a rawn thawn lut hi a ni.

■ IAS/IPS rual an rawn lut chho hum hum a, district-ah lo dah rawh u an rawn ti a, central guidelines kan zawm a ngai si.

■ District hrang hrangah DC leh SP-ahte kan dah a, 'Hnam dang SP/DC kan duh lo' an lo ti leh. Engtin nge kan tih ang, Mizoin kan daih si lo a ni.

■ District mipuite aurâwl chhâng theitu chu zirlaite hi in ni.

■ Result ṭha deuh kan neih hian thawk rim turin kan fit ṭan chiah tihna a ni a, hlawhtling turin kan thiam theihnate hi hmang ang u.

■ Thawkrimte chu an hlawhtling mai ṭhin. Kan ram hma hun ngaihtuahin i thawk rim ang u.

■ Pawl anga ram leh hnam tana kan ṭangkaina hi tâwk mai lo se, mimal angin ram leh hnam vei tel ang u.