Aizawl Intl. Half Marathon t-shirt tlangzarh; Marathon hi khawvelin a hlut - K Sapdanga

Aizawl International Half Marathon (AIHM) 2026 buatsaihtute bultumin nimin khan AIHM puala t-shirt buatsaih chu Home minister K Sapdanga'n a pisaah a tlangzarh a; khawvelin marathon an hlut thu a sawi. AIHM hi February 14, 2026 zingah Rajiv Gandhi Stadium-ah buatsaih a ni dawn.

Home Minister chuan, marathon chu ngaihtuah mai chuan thui tak tlan a nih deuh mai thu a sawi a, "Mahse, khawvelin a hlut em em. A hlut em emna chu intihsiakna, fitness leh hriselna atana ṭangkai tak a ni. Taksa min tichaktu a nih piah lamah, mahni inrintawkna min tuh theitu a ni. Kan nunphung atan pawh a ṭangkai em em," a ti.

Khawvelin fitness a uar telh telh thu sawiin K Sapdanga chuan, "Police lam pawhin fitness kan uar chho a, nikum kha fitness kumah kan puang a, kan chhunzawm zel," a ti a; AIHM 2026-ah police 150 an tlan ve dawn thu a sawi.

Sports minister Lalnghinglova chuan, AIHM thil tum zingah Mizoram chawi lâr a tel tih a sawi a, "Guwahati leh Delhi-ahte thuthar thehdarhtute kan kâwm. Nikum lamah beisei aia tam an lo tel a, kumin hian nikum aia tam an tel theih kan beisei. Sports department, Innovations India leh Athletics Asso-ciation of Mizoram ṭang-kawp buatsaih a ni," a ti.

AIHM chu Athletics Association of India (AAI) pawmpui a nih thu sawiin Sports Minister chuan, "AAI-a inziak lut tur hian cheng nuai 6 dawn sen a ni. Marathon hi February 14 khian kan nei dawn a, Kenya, Ethiopia, Bahrain leh Europe aṭangte pawhin tlan turin an rawn kal dawn a, Protected Area Permit buaipui mek a ni," a ti a, state hrang hrang aṭang pawhin an rawn tel dawn thu a sawi.

Aizawl International Half Marathon t-shirt tlangzarhnaa tarlan danin, AIHM hi NCC chuan an thláwp a, an mi leh sate'n a ṭul angin an buaipui dawn. Mizoram sorkar aṭangin medical team leh security lam uluk taka kalpui a nih dawn a, NCC medical team an inkulh dawn bawk. Tlanna tur kawngah water point leh chocolate bar te siam a ni dawn a, hmun hrang hrangah medical team an awm ang.

Aizawl International Half Marathon-a tel tur hian mi 2,000 chuang an inziak lut tawh a, online-a inziah luh hun chu nizan khan a tawp. Offline chuan Lammualah inziah luh theih a la ni thung.

AIHM-A TEL TUMTE HRIAT TUR

* February 14, zing dar 5:30-ah Rajiv Gandhi Stadium-ah kim tur.

* Governor Gen. Dr VK Singh-a'n zing dar 6-ah tlan turte a vailiam dawn.

* Tlan zawhah breakfast, inkawmhona, cultural progamme leh lawmman semna hun hman a ni ang.

* Registration fee Rs 799 a ni a, junior leh senior category bikah Rs 499 a ni.

* Online-a inziah luh hun February 11 zanah a tawp a, February 12-13 chhungin Lammualah ala inziah luh theih dawn.

* Category hrang hrang a awm a, lawmmanah cheng nuai 15 chuang sem ral a ni dawn.

CATEGORY

Half Marathon (km 21.1) - mipa leh hmeichhia

Open Race (km 10) - mipa leh hmeichhia

Fun Race (km 5) - mipa leh hmeichhia

Junior (km 5) - mipa leh hmeichhia kum 10-15 inkar leh senior (km 5) kum 60+