Minister-in IPR Press Tour a vailiam

Mizoram sorkarin IPR department kaltlanga press tour a buatsaiha kal turte chu nimin chawhma dar 10:30 khan IPR minister B Lalchhanzova'n IPR Directorate kawt aṭangin a vailiam. Tour-ah hian Mizoram Journalists' Association (MJA) member pariat leh IPR Directorate aiawh mi pahnih an kal a ni.

Vailiamna inkhawm tawi buatsaihah B Lalchhanzova chuan, zin chhuak turte chu Mizo hmêl lanna, Mizo tana ambassador an nih thu sawiin, press tour buatsaih zel tum a nih thu a sawi a; tour chu inzir zau nan leh ram tana hlâwkna hawn thei tura hman tum turin tour-a kalte a chah. IPR director K Vanlalsangi leh MJA president C Lalrambuatsaiha te pawhin thutawi an sawi.

Press tour-ah hian Aizawla MJA member pali leh district dang palia member pali an kal a; Hnahthiala IPRO F Lalrinfela leh MJA vice president C Lalhmachhuana ten an ho a, Delhi leh a chhehvela hmun pawimawhte an tlawh ang.

IPR department hian February 21-26, 2026 chhungin Kolkata leh a chhehvelah press tour buatsaih leh a tum bawk.