BSNL ramte Mizoram sorkarin a neih chhâwn dan tur sawiho

February 9, Thawhṭanni khan chief minister Lalduhoma a hoin a pisaah, India ram khawpui ṭhenkhata BSNL-in ram ṭha a neihte Mizoram sorkarin a neih chhawn dan tur sawiho a ni.

Khawpui ṭhenkhata BSNL ram Mizoram sorkarin a neih chhawn theih dan tur hi CM Lalduhoma leh BSNL Chairman cum Managing Director ten an lo sawi dûn tawh a; General Administration department (GAD) chuan hma la turin Mizoram Tourism Development Authority (MTDA) a ruat.

MTDA hian PMC atan Urban Infrastucture Management Service-te open tender hmangin an thlang tawh a; PMC-te chuan BSNL-in khawpui hrang hranga ram hman tur a neihte an en kual mek a, Beltola, Guwahati leh Delhi-ahte ram an en tawh.

CM Lalduhoma duh dan angin, Mumbai, Chennai, Vellore, Bengaluru, Kolkata, Hyderabad leh Shillong-ahte ram la zawn zel tur a ni a; state pawn khawpuia BSNL hmunhmate sorkarin a la chhawng a, sorkar mamawh ang building sa tur hian state sorkar sum sen ngai loa tih dan rawtna awmte sawiho a ni bawk.

ṭhutkhawmnaah hian Tourism minister Lalnghinglova Hmar, GAD secretary Sudhir Kumar, secretary to CM Vanlaldina Fanai, Tourism director Lalrodingi leh Mizorama BSNL hotute an tel a ni.