Lammualah LESDE Kût, 2026 hawn a ni

Labour, Employment Skill Development and Entrepreneurship (LESDE) department chuan nimin khan Lammualah LESDE Kût an buatsaih ṭan a, Governor Gen. Dr Vijay Kumar Singh-a'n a hawng. Larsap hian LESDE department hnuaia welfare board member-te hamṭhatna tura duan ‘Rahbi Chhertu’ leh ‘Eizawnna Kailawn’ a tlangzarh.

Governor chuan, sum lei paia hmasawnna chu eizawnna thar siam chhuah zatah te, ṭhalai thiamna nei chher chhuah tamah te, entrepreneur chawikan tamah te, hmeichhia leh thingtlang mite huap zo hmalaknaah te a innghah thu a sawi a, "Micro, Small and Medium Enterprises (MSME) sector hi ram ṭhanna atan a pawimawh a, India ram hi MSME sector-ah khawvel hriat hlawh leh ṭhang chak berte zinga mi a ni. MSME hmalakna hi thingtlang kilkhawr thleng phaka kalpui a ṭul," a ti.

Mizoram chu hnam ziarâng hausa tak, kut themthiam, kut hnathawh lama theihna nei leh thil siam chhuahnaa theihna sang tak nei a nih thu sawiin Larsap chuan, "Theihna hai chhuak tura ṭan lak a ṭul. Tunlai thiamna behchhan khawvel sum leh pai dinhmun ṭhang chak tak karah kan thiamnate tihpun ve zel a ṭul a, entrepreneur chawikan phute tan sorkar lam pawhin theihtawp an chhuah a ṭul," a ti a; hmasawnna tlo leh huap zo nei state siam turin Mizo mipui a sawm.

LESDE minister Lalnghinglova Hmar pawhin thu sawiin, LESDE chu Bána Kaih scheme nena inrem taka kal kawp thei a nih thu a sawi a, "Bána Kaih hi kan ṭhalaite leh hnathawktute an kal zelna kawng tinrenga an kuta vawn leh zui zel tihna a ni a, LESDE Kût hi intihhlimna ni loin, ṭhalaite tana hna zawnnaa hun remchang siamna a ni," a ti.

Lalnghinglova Hmar chuan, LESDE Kût chu ṭhalaite tan thiamna zirna hmun te, sumdawnna lama inpuihna te, hnazawnna hmun leh hnathawktute hamṭhatna inhrilhfiahna atana ruahman a nih thu a sawi a; February 10-14, 2026 chhungin chhim turin Mizoram mipui a sawm. Kutah hian stall 168 siam a ni.