YMA hnenah ruihhlo dona atan motor hlan

Nimin chawhnu khan Formosa Foundation-in Reliance Industries Ltd kaltlang a 4x4 bolero xamper 9, Mizorama Sub Hqrs YMA zawng zawngte tana ruihhlo dona atana an pek chu Central YMA Hall-ah inhlan a ni.

Formosa chairman Jonathan Lalremruata chuan motor hlan tur lo pianchhuah dan sawiin, "Reliance hotu Anant Ambani nen December 8, 2025 khan Jamnagar-a kan inkawmnaah 'Mizoram tan enge kan tihsak theih che' a tih angin, CYMA hotute chu ram tana ṭangkai an mamawh ka zawh hnuah ruihhlo ro nana heng 4x4 camper an mamawh hle thu ka hrilh a, tun hun hi a lo thleng ta a ni," a ti.

Johnathan-a chuan Formosa Foundation hi Covid-19 lai khan Mizoramah din a nih thu sawiin, "Hripui len lai khan ei leh bar a harsa chhungkaw 14,192 te tana ration te sem in, heng bakah hian ventilator, oxygen concentrator, PPE, mask leh school bus-te mipuite hnenah kan lo pe tawh a ni," a ti a, Covid -19 laia hmalaknaah YMA nen thawkhoa hma lak ṭhin a nih thu a sawi.