Aizawlah Bharat Rang Mahotsav buatsaih

Nimin khan National School of Drama, New Delhi leh Art & Culture department ṭangkawp chuan Vanapa Hall-ah theatre hmanga hnam ziarang leh lemchan phochhuahna – ‘25th Bharat Rang Mahotsav 2026’ an buatsaih a, Art & Culture director Carol VLMS Dawngkimi'n a hmanpui.

Art & Culture Director chuan National School of Drama (NSD) nena thawhona ṭha tak an nei thei chu lawmawm a tih thu sawiin, "Institute of Music & Fine Arts (IMFA) hnuaiah drama, hnam lam leh music zirnate tih chantlun zel kan tum. Mi tam takin an hman ṭangkai tawh thu a sawi a. Heng zirnate hi mi tam zawkin an lo hriat a an lo ṭangkai pui zel ka beisei," a ti a, zirlaite pawh an tuina a nih phawt chuan IMFA hnuaiah hian zirve ngei turin a sawm.

National School of Drama dean Shantanu Bose pawhin thu sawiin, Mizoram chuan hnam zia rang ropui tak a neih thu leh hmun zau zawka phochhuah tham hnam rohlu tha tak tak a neih thu a sawi a, "He theatre festival kaltlang hian hnam hausakna tam tak chu vawngnun leh phochhuah zel a nih ngei ka beisei. Mizoram hi hemi kawngah hian thawhpui zel kan duh," a ti.

25th Bharat Rang Mahotsav 2026 hi January 28, 2026 khan Delhi-ah neih ṭan a lo ni tawh. India ram hmun hrang hrangah hman tura kalpui chhoh zel niin union territory leh state zawng zawngahte hman a ni dawn. Ram pawnah pawh neih tura ruahman niin, continent pangaah hman tura ruahman a ni. Bharat Rang Mahotsav hi khawvela theatre festival lian ber niin National School of Drama chuan hemi kaltlang hian theatre culture chawisan hi a tum a ni.

Vanapa Hall-a 25th Bharat Rang Mahotsav 2026 neihah hian National School of Drama chuan MacBeth William Shakespeare-a ziah ‘Flesh’ an entir. Mizoram aṭangin Chawngmawii leh Hrangchhuana entir a ni bawk a ni. He hunah hian Sikulpui School zirlai leh zirtirtute bakah IMFA hnuaia zir chhuak tawhte sawm an nih angin an tel thei a ni.